ഏകദിന ലോകകപ്പിലേക്ക് വെറും മൂന്ന് മാസം ബാക്കിനില്‍ക്കെ അവിചാരിതമായി ബംഗ്ലാദേശ് ക്രിക്കറ്റ് ടീം ക്യാപ്റ്റന്‍ തമീം ഇഖ്ബാല്‍ രാജ്യാന്തര ക്രിക്കറ്റില്‍ നിന്ന് വിരമിച്ചു. വാര്‍ത്താസമ്മേളനത്തിലാണ് തമീം വിരമിക്കല്‍ പ്രഖ്യാപനം നടത്തിയത്. ഇത്ര തിടുക്കത്തില്‍ വിരമിക്കാനുള്ള തീരുമാനമെടുത്തത് എന്തുകൊണ്ടാണെന്നതില്‍ വ്യക്തതയില്ല. 34കാരനായ തമീം ബംഗ്ലാദേശ് കണ്ട ഏറ്റവും മികച്ച താരങ്ങളില്‍ ഒരാളായിരുന്നു. ഇതോടെ 16 വര്‍ഷം നീണ്ട രാജ്യാന്തര കരിയറാണ് തമീം അവസാനിപ്പിച്ചത്.
പരുക്കേറ്റതിനെ തുടര്‍ന്ന് അഫ്ഗാനിസ്താനെതിരായ ടെസ്റ്റില്‍ നിന്ന് പിന്മാറിയ തമീം ഏകദിന പരമ്പരയ്ക്കുള്ള ടീമില്‍ ഉള്‍പ്പെടുകയും ആദ്യ കളി കളിക്കുകയും ചെയ്തു. ശനിയാഴ്ച പരമ്പരയിലെ രണ്ടാം മത്സരം നടക്കാനിരിക്കെയാണ് താരത്തിന്റെ വിരമിക്കല്‍ പ്രഖ്യാപനം. 241 ഏകദിന മത്സരങ്ങളില്‍ നിന്നായി 8313 റണ്‍സ് നേടിയ തമീം ഈ ഫോര്‍മാറ്റില്‍ ബംഗ്ലാദേശിനായി ഏറ്റവുമധികം റണ്‍സ് നേടിയ താരമാണ്. ഏകദിനത്തില്‍ ബംഗ്ലാദേശിനായി ഏറ്റവുമധികം സെഞ്ചുറികളും (14) തമീം തന്നെയാണ് നേടിയത്. ഏകദിനത്തില്‍ ഏറ്റവുമധികം റണ്‍സ് നേടിയ നിലവില്‍ കളിക്കുന്നവരുടെ പട്ടികയില്‍ കോലി, രോഹിത് എന്നിവര്‍ക്ക് പിന്നില്‍ മൂന്നാമതാണ് തമീം. 70 ടെസ്റ്റ് മത്സരങ്ങളില്‍ നിന്നായി 7188 റണ്‍സ് നേടിയ താരം ഈ പട്ടികയില്‍ രണ്ടാമതാണ്. കഴിഞ്ഞ വര്‍ഷം താരം ടി-20കളില്‍ നിന്ന് വിരമിച്ചിരുന്നു.
