ഈ വർഷം ആസൂത്രണം ചെയ്‍തിരിക്കുന്ന ടാറ്റയുടെ മോഡല്‍ ലോഞ്ചുകകളില്‍ ഒന്നാണ് പഞ്ച് ഇവി. ഒരുപക്ഷേ 2023 ദീപാവലി സീസണിൽ ഈ മോഡല്‍ ലോഞ്ച് ചെയ്‍തേക്കും എന്നാണ് റിപ്പോര്‍ട്ടുകള്‍. ഇതിന് ഇവിടെ നേരിട്ടുള്ള എതിരാളികളൊന്നും ഉണ്ടാകില്ല, എന്നാൽ വിലനിർണ്ണയത്തിന്റെ കാര്യത്തിൽ ഇത് സിട്രോൺ eC3 , എംജി കോമറ്റ് എന്നിവയ്‌ക്കെതിരെ നേർക്കുനേർ മത്സരിക്കും . ഇലക്ട്രിക് മൈക്രോ എസ്‌യുവി നിലവിൽ അതിന്റെ പരീക്ഷണ ഘട്ടത്തിലാണ്. അടുത്തിടെ അതിന്റെ ഇന്റീരിയറിന്റെ ചില വിവരങ്ങള്‍ പുറത്തുവന്നു. ടാറ്റ പഞ്ച് ഇവിക്ക് കര്‍വ്വ് ആശയത്തിൽ നിന്ന് പ്രചോദനം ഉൾക്കൊണ്ട് ക്യാബിനിനുള്ളിൽ ചില മാറ്റങ്ങൾ ലഭിക്കും.
മധ്യഭാഗത്ത് പ്രകാശമുള്ള ലോഗോയും ഹാപ്‌റ്റിക് ടച്ച് നിയന്ത്രണങ്ങളുമുള്ള പുതിയ ടു-സ്‌പോക്ക് സ്റ്റിയറിംഗ് വീലും ഉണ്ടാകും. 360 ഡിഗ്രി ക്യാമറയുണ്ടാകുമെന്ന് സൂചന നൽകുന്ന വിങ് മിററുകളുള്ള ഇന്റഗ്രേറ്റഡ് ക്യാമറ മൊഡ്യൂളുകളുള്ള ടെസ്റ്റ് പതിപ്പിനെ പുതിയ ചാര ചിത്രങ്ങൾ കാണിക്കുന്നു. നെക്സോണ്‍ ഇവി മാക്സിന് സമാനമായ ഇലക്ട്രോണിക് പാർക്കിംഗ് ബ്രേക്കും റോട്ടറി ഡ്രൈവ് സെലക്ടറും ഉള്ള അതിന്റെ പ്രോട്ടോടൈപ്പുകളിൽ ഒന്നിനെ കമ്പനി പരീക്ഷിക്കുന്നുണ്ട്. ടാറ്റയുടെ പുതിയ 10.25 ഇഞ്ച് ടച്ച്‌സ്‌ക്രീൻ യൂണിറ്റിന് പകരം 7 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ഉപയോഗിച്ചാണ് മൈക്രോ ഇവിയുടെ ടെസ്റ്റ് പതിപ്പ് പരീക്ഷക്കുന്നത്.
7 ഇഞ്ച് TFT ഇൻസ്ട്രുമെന്റ് ക്ലസ്റ്റർ, ഓട്ടോമാറ്റിക് ക്ലൈമറ്റ് കൺട്രോൾ, പുഷ്-ബട്ടൺ സ്റ്റാർട്ട്/സ്റ്റോപ്പ്, ലെതർ പൊതിഞ്ഞ സ്റ്റിയറിംഗ് വീലും ഗിയർ നോബും, iRA കണക്റ്റിവിറ്റി ടെക്, വോയ്‌സ് കമാൻഡുകൾ, ഓട്ടോ-ഫോൾഡ് ഓആര്‍വിഎമ്മുകൾ, കൂൾഡ് ഗ്ലോവ്‌ബോക്‌സ് തുടങ്ങിയ സവിശേഷതകളും പ്രതീക്ഷിക്കുന്നു. പിൻ ഡ്രം ബ്രേക്കുകളുള്ള ഐസിഇ-പവർ കൗണ്ടർപാർട്ടിൽ നിന്ന് വ്യത്യസ്‍തമായി, പഞ്ച് ഇവിക്ക് പിൻ ഡിസ്‍ക് ബ്രേക്കുകൾ ഉണ്ടായിരിക്കും.
ശ്രേണിയെ സംബന്ധിച്ചിടത്തോളം, ടാറ്റ പഞ്ച് ഇവി ഒറ്റ ചാർജിൽ ഏകദേശം 300 കിലോമീറ്റർ റേഞ്ച് ലഭിക്കാൻ സാധ്യതയുണ്ട്. 19.2kWh, 24kWh ബാറ്ററി പാക്ക് ഓപ്ഷനുകളുമായി വരുന്ന ടിയാഗോ ഇലക്ട്രിക്ക് ഹാച്ച്ബാക്കുമായി മൈക്രോ ഇവി അതിന്റെ പവർട്രെയിനുകൾ പങ്കിട്ടേക്കാം. ആദ്യത്തേത് 74 ബിഎച്ച്പി ഇലക്ട്രിക് മോട്ടോറുമായി വരുമ്പോൾ രണ്ടാമത്തേത് 61 ബിഎച്ച്പി ഇലക്ട്രിക് മോട്ടോറുമായാണ് ജോടിയാക്കിയിരിക്കുന്നത്. ചെറിയ ശേഷിയുള്ള ബാറ്ററി 250 കിലോമീറ്റർ റേഞ്ച് വാഗ്ദാനം ചെയ്യുന്നു. വലിയ ശേഷിയുള്ള ബാറ്ററി 315 കിലോമീറ്റർ നൽകുന്നു. എൻട്രി ലെവൽ വേരിയന്റിന് 12 ലക്ഷം രൂപ മുതൽ ടാറ്റ പഞ്ച് ഇവിയുടെ വില ആരംഭിക്കുമെന്ന് പ്രതീക്ഷിക്കുന്നു.
