ഛത്തീസ്ഗഢ്: ഛത്തീസ്ഗഢില്‍ നിന്ന് അഞ്ച് വര്‍ഷം മുമ്പ് കാണാതായ മാധ്യമപ്രവര്‍ത്തകയുടെ മൃതദേഹം കണ്ടെത്തി. ഛത്തീസ്ഗഢിലെ കോര്‍ബ-ദാരി റോഡില്‍ പോളിത്തീന്‍ ഷീറ്റില്‍ പൊതിഞ്ഞ നിലയിലറിയിരുന്നു മൃതദേഹം. വാര്‍ത്താ അവതാരക സല്‍മ സുല്‍ത്താനയെ കണ്ടെത്താന്‍ പൊലീസ് തെരച്ചില്‍ നടക്കുന്നതിനിടെയാണ് മൃതദേഹം കണ്ടെത്തിയിരിക്കുന്നത്.
കഴിഞ്ഞ ദിവസമാണ് മൃതദേഹം കണ്ടെത്തിയത്. മാധ്യമപ്രവര്‍ത്തകയെ കൊന്ന് കുഴിച്ചുമൂടിയതാണെന്ന് പൊലീസിന് സൂചന ലഭിച്ചിരുന്നു. ഇതേത്തുടര്‍ന്നാണ് മൃതദേഹം കണ്ടെത്തുന്നതിനായി കോര്‍ബ-ദാരി നാലുവരിപ്പാത കുഴിച്ച് പരിശോധന നടത്താന്‍ പൊലീസ് തീരുമാനിച്ചത്. മൃതദേഹത്തോടൊപ്പം ഒരു ജോടി ചെരിപ്പും കണ്ടെടുത്തു. അതേസമയം മൃതദേഹം തിരിച്ചറിയാന്‍ സല്‍മയുടെ കുടുംബത്തിന് കഴിഞ്ഞിട്ടില്ല.
കോര്‍ബയുടെ പ്രാന്തപ്രദേശമായ കുസ്മുണ്ട സ്വദേശിയാണ് പതിനെട്ടുകാരിയായ സല്‍മ സുല്‍ത്താന. 2018 ഒക്ടോബര്‍ 21ന് കുസ്മുണ്ടയില്‍ നിന്ന് കോര്‍ബയിലേക്ക് ജോലിക്കായി പോയ സല്‍മയെ പിന്നീട് കാണാതാവുകയായിരുന്നു. വീട്ടുകാര്‍ തെരച്ചില്‍ നടത്തിയെങ്കിലും ഒരു തുമ്പും കിട്ടാത്തതിനെ തുടര്‍ന്ന് പൊലീസില്‍ പരാതി നല്‍കി.
ദാരി എസ്പി റോബിന്‍സണ്‍ ഗുഡിയ തീര്‍പ്പാക്കാത്ത കേസുകള്‍ അവലോകനം ചെയ്തിരുന്നു. തുടര്‍ന്ന് മെയ് മാസത്തില്‍ സല്‍മയുടെ കേസ് അന്വേഷണം വീണ്ടും ആരംഭിക്കാന്‍ നിര്‍ദേശം നല്‍കുകയായിരുന്നു. അന്വേഷണത്തിന്റെ അഭാവം ചൂണ്ടിക്കാട്ടിയായിരുന്നു നടപടി. പിന്നീട് നടത്തിയ അന്വേഷണത്തില്‍ കോര്‍ബയിലെ ഒരു ബാങ്കില്‍ നിന്ന് സല്‍മ ലോണ്‍ എടുത്തിരുന്നുവെന്നും 2018 വരെ യുവതി തിരിച്ചടച്ചിരുന്നതായും കണ്ടെത്തി. 2019 ന് ശേഷം വായ്പാ തിരിച്ചടവ് മുടങ്ങി.
അന്വേഷണത്തില്‍ സല്‍മയെ അഞ്ച് വര്‍ഷം മുമ്പ് കൊലപ്പെടുത്തി മൃതദേഹം കോര്‍ബ-ദാരി റോഡില്‍ കുഴിച്ചിട്ടതായി പൊലീസിന് വിവരം ലഭിച്ചു. മെയ് 30 ന്, സല്‍മയെ അടക്കം ചെയ്യാന്‍ സാധ്യതയുള്ള സ്ഥലത്തെക്കുറിച്ച് പൊലീസിന് സൂചന ലഭിച്ചു. ജെസിബി കൊണ്ട് റോഡ് കുഴിച്ച് പരിശോധന നടത്തിയെങ്കിലും മൃതദേഹം കണ്ടെത്താനായില്ല. പിന്നീട് കോര്‍ബ-ദാരി റോഡിന്റെ ഭൂമിശാസ്ത്രപരമായ ഘടന പൂര്‍ണ്ണമായും മാറിയെന്നും ഒറ്റപ്പാത നാലുവരി റോഡായി മാറിയെന്നും പൊലീസ് പറഞ്ഞു.എന്നാല്‍ പൊലീസ് ചൊവ്വാഴ്ച വീണ്ടും പരിശോധന നടത്തി. ഇതോടെയാണ് മൃതദേഹം കണ്ടെടുത്തത്. കേസില്‍ കൂടുതല്‍ അന്വേഷണങ്ങള്‍ നടന്നുവരികയാണെന്നും പൊലീസ്.
