ന്യൂഡല്‍ഹി: കേന്ദ്ര സര്‍ക്കാര്‍ ജീവനക്കാരുടെയും പെന്‍ഷന്‍കാരുടെയും ക്ഷാമബത്ത വര്‍ധിപ്പിക്കാന്‍ ആലോചിച്ച് കേന്ദ്രം. നാല് ശതമാനം വര്‍ധനവ് നടപ്പില്‍ വരുത്താനാണ് തീരുമാനം. ഒരു കോടിയിലധികം പേര്‍ക്ക് ഈ തീരുമാനത്തിന്റെ ഗുണം ലഭിച്ചേക്കും.
നിലവിലുള്ള 38 ശതമാനത്തില്‍ നിന്ന് 42 ശതമാനമായിട്ടാകും ഡി എ വര്‍ധിപ്പിക്കുക. ഈ വര്‍ഷം ജനുവരി ഒന്ന് മുതല്‍ മുന്‍കാല പ്രാബല്യത്തോടെയാണ് വര്‍ധനവ് ഉണ്ടാകുകയെന്ന് പിടിഐ റിപ്പോര്‍ട്ട് ചെയ്തു.
തൊഴില്‍ മന്ത്രാലയത്തിന്റെ ലേബര്‍ ബ്യൂറോ ഉപഭോക്തൃ വില സൂചികയുടെ അടിസ്ഥാനത്തിലാണ് ക്ഷാമബത്ത കണക്കാക്കുന്നത്. സൂചികയുടെ വാര്‍ഷിക ശരാശരി 361.75 പോയിന്റില്‍ നിന്ന് 372.25 പോയിന്റായി ഉയര്‍ന്നു.
