ഹോംബാലെ ഫിലിംസ് നിര്‍മിക്കുന്ന ആദ്യ മലയാള ചിത്രം ‘ധൂമ’ത്തിന്റെ ട്രെയിലര്‍ പുറത്തിറക്കി. പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ഈ ചിത്രം ഒരു സസ്‌പെന്‍സ് ത്രില്ലറാണ്.
‘A few Souls leave behind a trail (er) of Smoke and Mirrors’ എന്ന ടാഗ്ലൈനോടുകൂടിയാണ് ട്രെയിലര്‍ പുറത്തിറക്കിയിരിക്കുന്നത്. പ്രേക്ഷകരെ ആകാംക്ഷാഭരിതരാക്കുന്ന തരത്തിലാണ് ട്രെയിലര്‍ ഒരുക്കിയിട്ടുള്ളത്. ചിത്രം കേരളത്തില്‍ വിതരണം ചെയ്യുന്നത് മാജിക് ഫ്രെയിംസും പൃഥ്വിരാജ് പ്രൊഡക്ഷന്‍സും ചേര്‍ന്നാണ്. ഹോംബാലെ ഫിലിംസിന്റെ ബാനറില്‍ വിജയ് കിരഗന്തൂര്‍ നിര്‍മ്മിക്കുന്ന ‘ധൂമം’ മലയാള ചലച്ചിത്ര വ്യവസായത്തിലെ ഹോംബാലെ ഫിലിംസിന്റെ അരങ്ങേറ്റവും ‘രാജകുമാര’, ‘കെജിഎഫ്’ സീരീസ്, ‘കാന്താര’ എന്നിവയുടെ വന്‍ വിജയത്തിന് ശേഷമുള്ള അടുത്ത വലിയ റിലീസുമാണ്.
‘ലൂസിയ’, ‘യു-ടേണ്‍’ തുടങ്ങിയ ചിത്രങ്ങളിലൂടെ ശ്രദ്ധ നേടിയ പവന്‍ കുമാര്‍ രചനയും സംവിധാനവും നിര്‍വ്വഹിക്കുന്ന ചിത്രത്തില്‍ ഫഹദ് ഫാസില്‍, അപര്‍ണ ബാലമുരളി, അച്യുത് കുമാര്‍ എന്നിവരാണ് പ്രധാന വേഷത്തിലെത്തുന്നത്. റോഷന്‍ മാത്യു, വിനീത് രാധാകൃഷ്ണന്‍, അനു മോഹന്‍, ജോയ് മാത്യു, നന്ദു, ഭാനുമതി എന്നിവരും ചിത്രത്തിലുണ്ട്. കേരളത്തില്‍ മാത്രം 300-ലധികം സ്‌ക്രീനുകളിലാണ് ധൂമം റിലീസിനൊരുങ്ങുന്നത്. മലയാളം, തമിഴ്, തെലുങ്ക്, കന്നട എന്നീ നാല് ഭാഷകളില്‍ ചിത്രം എത്തും.
