സ്‌പെയിന്‍: സ്പാനിഷ് ലീഗില്‍ റയല്‍ മാഡ്രിഡ് ഒന്നിനെതിരെ മൂന്നു ഗോളിന് റയല്‍ സോഷ്യദാദിനെ വീഴ്ത്തി.
നാല് കളികളില്‍ നിന്നുമായി റയല്‍ മാഡ്രിഡിന്റെ രണ്ടാം ജയമാണിത്.
സീസണിലെ ആദ്യ മൂന്നു മത്സരങ്ങളും ജയിച്ചിരുന്ന സോഷ്യദാദിനെ അവരുടെ തട്ടകത്തില്‍ നേരിട്ട റയല്‍ മാഡ്രിഡ് 19-ാം മിനുട്ടില്‍ ബോര്‍ഹ മയോറലിലൂടെയാണ് മുന്നിലെത്തിയത്.
28-ാം മിനുട്ടില്‍ കെവിന്‍ റോഡ്രിഗ്യൂസ് സോഷ്യദാദിനെ ഒപ്പമെത്തിച്ചു. എന്നാല്‍ 36-ാം മിനുട്ടില്‍ മയോറലിന്റെ ക്രോസ് തടയാനുള്ള ശ്രമത്തില്‍ കെവിന്‍ റോഡ്രിഗ്യൂസ് സ്വന്തം വലയില്‍ പന്തെത്തിച്ചതോടെ റയലിന് വീണ്ടും ലീഡായി.
61-ാം മിനുട്ടില്‍ ഗരത് ബെയ്‌ലിന്റെ ബൂട്ടുകളുടെ മിടുക്ക് റയലിന്റെ വിജയമുറപ്പിച്ച് ലക്ഷ്യത്തിലേക്കെത്തിച്ചു.
സീസണിലെ രണ്ടാം ജയത്തോടെ റയല്‍ പോയിന്റ് ടേബിളില്‍ നാലാം സ്ഥാനത്തേക്ക് കയറി.
എന്നാല്‍ തോല്‍വി ഏറ്റുവാങ്ങിയെങ്കിലും ഒമ്പത് പോയിന്റോടെ സോഷ്യദാദ് മൂന്നാം സ്ഥാനത്തുണ്ട്. 12 പോയിന്റുമായി ബാര്‍സയാണ് ഒന്നാം സ്ഥാനത്ത്.
