കാസര്‍കോട്: പെരിയ ഇരട്ടകൊലക്കേസിലെ പ്രതികളുടെ ഭാര്യമാര്‍ ജോലി രാജിവെച്ചു. യൂത്ത് കോണ്‍ഗ്രസ് പ്രവര്‍ത്തകരായ ശരത്‌ലാലിനെയും കൃപേഷിനെയും കൊലപ്പെടുത്തിയ കേസിലെ പ്രതികളുടെ ഭാര്യമാരാണ് ജില്ല ആശുപത്രിയിലെ ശുചീകരണ ജോലി ഉപേക്ഷിച്ചത്.
ഒന്നാംപ്രതി അയ്യങ്കാവ് വീട്ടില്‍ പീതാംബരന്റെ ഭാര്യ ഏച്ചിലടുക്കത്തെ പി. മഞ്ജുഷ, രണ്ടാംപ്രതി സജി സി. ജോര്‍ജിന്റെ ഭാര്യ ചിഞ്ചു ഫിലിപ്, മൂന്നാംപ്രതി കെ.എം. സുരേഷിന്റെ ഭാര്യ എസ്. ബേബി എന്നിവരാണ് കഴിഞ്ഞ ദിവസം ജോലിയില്‍നിന്ന് രാജിവെച്ചത്. രണ്ടരമാസം മുമ്പ് ഇവര്‍ക്ക് ജോലി ലഭിച്ചപ്പോള്‍ മുതല്‍ കടുത്ത എതിര്‍പ്പും സമരങ്ങളുമാണ് നടന്നത്.
കൊലക്കേസ് പ്രതികള്‍ക്കും മനുഷ്യാവകാശങ്ങളുണ്ടെന്ന് പറഞ്ഞാണ് സി.പി.എം ഇതിനെ പ്രതിരോധിച്ചത്. താല്‍ക്കാലിക ജോലിയാണെന്നു പറഞ്ഞും പാര്‍ട്ടി നിലകൊണ്ടെങ്കിലും ഒടുവില്‍ ജോലി വിടാന്‍ ഇവരോട് നിര്‍ദേശിക്കുകയായിരുന്നു.
