വെള്ളനാട്: യോഗ ക്ലാസിന് പോകാന്‍ കൂട്ടുകാരിയെ കാത്ത് നിന്ന യുവതിയുടെ വിലപിടിപ്പുള്ള മൊബൈല്‍ ഫോണ്‍ കാറില്‍ എത്തിയവര്‍ വെട്ടുകത്തി കാണിച്ച് ഭീഷണിപ്പെടുത്തി തട്ടിയെടുത്തു. കുളക്കോട് കിഴക്കുകര തിരുവോണം വീട്ടില്‍ ആതിര (30) യുടെ ഫോണ്‍ ആണ് നഷ്ടപ്പെട്ടത്.
അല്‍പം അകലെ നിര്‍ത്തിയ കാറില്‍ നിന്ന് ഇറങ്ങിയ രണ്ടു പേരാണ് റോഡരികില്‍ നില്‍ക്കുകയായിരുന്ന യുവതിയെ ഭീഷണിപ്പെടുത്തിയത്. മൊബൈല്‍ തട്ടിയെടുത്ത ശേഷം ഇവര്‍ കാറില്‍ കയറി സ്ഥലം വിട്ടു. ഇന്നലെ രാവിലെ 5.40ന് കുളക്കോട് ജംക്ഷനില്‍ ആണ് സംഭവം. സമീപത്തെ കടയില്‍ സ്ഥാപിച്ചിരുന്ന സിസിടിവിയില്‍ ഇവരുടെ ദൃശ്യം പതിഞ്ഞു. ആര്യനാട് പൊലീസ് കേസെടുത്തു.
