തിരുച്ചിറപ്പള്ളി: തമിഴ്‌നാട്ടിലെ തിരുച്ചിറപ്പള്ളി പടക്ക ഫാക്ടറിയില്‍ വന്‍ സ്‌ഫോടനം. അപകടത്തില്‍ 20 പേര്‍ മരിച്ചതായും നിരവധി പേര്‍ക്ക് പൊള്ളലേറ്റെന്നുമാണ് പ്രാഥമിക വിവരങ്ങള്‍.
സ്‌ഫോടനം നടക്കുന്ന സമയത്ത് പടക്കശാലയില്‍ 24 പേരുണ്ടായിരുന്നതായാണ് വിവരം. പരിക്കേറ്റവരില്‍ പലരുടെയും നില ഗുരുതരമാണ്.
തുറയൂരിനടുത്തെ മുരുകന്‍പെട്ടി എന്ന സ്ഥലത്ത് സ്ഥിതി ചെയ്യുന്ന പടക്ക ഫാക്ടറിയിലാണ് ഇന്നു രാവിലെ സ്‌ഫോടനമുണ്ടായത്. വന്‍ ശബ്ദത്തോടെയാണ് ഫാക്ടറിയില്‍ പൊട്ടിത്തെറിയുണ്ടായത്. കെട്ടിടത്തിന്റെ ഒരു ഭാഗം പൂര്‍ണമായും തകര്‍ന്നു. സമീപത്തെ നിരവധി വീടുകള്‍ക്കും സ്‌ഫോടനത്തില്‍ കേടുപാടുകള്‍ സംഭവിച്ചിട്ടുണ്ട്.
ഫാക്ടറിക്കെതിരെ നാട്ടുകാര്‍ നിരവധി തവണ അധികൃതര്‍ക്ക് പരാതി നല്‍കിയിരുന്നതാണെന്നും വിവരങ്ങള്‍ ലഭിക്കുന്നുണ്ട്.
