ഹൈദരാബാദ്: ആരാധകര്‍ ഏറ്റവുമധികം ആകാംക്ഷയോടെ കാത്തിരിക്കുന്ന ചിത്രമാണ് പ്രഭാസ് നായകനാകുന്ന ‘പ്രോജക്ട് കെ’. ചിത്രത്തിന്റെ ടൈറ്റില്‍ പ്രഖ്യാപിച്ചു. നാഗ് അശ്വിന്‍ സംവിധാനം ചെയ്യുന്ന ചിത്രത്തിന്റെ പേര് ‘കല്‍കി 2898 എഡി’ എന്നാണ്. സാന്‍ ഡീഗോ കോമിക്-കോണ്‍ 2023ലാണ് ടൈറ്റില്‍ പ്രഖ്യാപിച്ചത്.
നാഗ് അശ്വിന്‍ തന്നെയാണ് തിരക്കഥയും. ദീപിക പദുക്കോണാണ് ചിത്രത്തിലെ നായിക. ചിത്രത്തില്‍ അമിതാഭ് ബച്ചന്‍, കമലഹാസന്‍, ദിഷാ പഠാനി എന്നിവരുള്‍പ്പെടുന്ന വമ്പന്‍ താരനിരയാണുള്ളത്.സന്തോഷ് നാരായണനാണ് കല്‍കിയുടെ പാട്ടുകള്‍ ഒരുക്കുക. ഇതൊരു ടൈം ട്രാവല്‍ സിനിമ അല്ല എന്ന് സംഭാഷണ രചയിതാവായ സായ് മാധവ് ബുറ നേരത്തെ വ്യക്തമാക്കിയിരുന്നു. 600 കോടി രൂപയാണ് ബജറ്റ്. ചിത്രത്തിന്റെ ഗ്ലിംസും അണിയറക്കാര്‍ പുറത്തുവിട്ടിട്ടുണ്ട്. ഒരു ഹോളിവുഡ് ടെച്ചോടെയാണ് ചിത്രം എത്തുന്നത്. ദീപിക പാദുകോണ്‍, പശുപതി എന്നിവരെ ഈ ദൃശ്യങ്ങളില്‍ കാണാം. സൂപ്പര്‍ഹീറോ വേഷത്തിലാണ് പ്രഭാസ് എത്തുന്നത്.
ഡിസിയും മാര്‍വലും അടക്കം ലോകത്തിലെ വന്‍ പ്രൊഡക്ഷന്‍ കമ്പനികള്‍ തങ്ങളുടെ ഭാവി പ്രൊജക്ടുകള്‍ പ്രഖ്യാപിക്കുന്ന വേദിയാണ് സാന്‍ ഡീഗോ കോമിക്-കോണ്‍. അവിടെ പ്രഖ്യാപനം നടക്കുന്ന ആദ്യ ഇന്ത്യന്‍ സിനിമയാണ് കല്‍കി. വൈജയന്തി മൂവീസാണ് കല്‍കി നിര്‍മ്മിക്കുന്നത്. ഹിന്ദു പുരാണം അനുസരിച്ച് വിഷ്ണുവിന്റെ പത്താമത്തെ അവതാരമാണ് കല്‍കി. ആ കല്‍കിയുടെ അവതാരത്തെ ഒരു ഫ്യൂച്ചറിസ്റ്റിക് രീതിയില്‍ സമീപിച്ചിരിക്കുകയാണ് ചിത്രത്തില്‍ എന്നാണ് സൂചന.
