ആഷിഖ് അബുവിന്റെ സംവിധാനത്തില്‍ കഴിഞ്ഞ വര്‍ഷം പുറത്തിറങ്ങിയ ചിത്രമായിരുന്നു മായാനദി. വിമര്‍ശനങ്ങള്‍ കൊണ്ടും റിയലിസ്റ്റിക് ആയതുകൊണ്ടും പ്രേക്ഷകശ്രദ്ധ നേടിയ ചിത്രം കൂടിയായിരുന്നു മായാനദി. ടൊവിനോ തോമസ് നായകനായി അഭിനയിച്ച സിനിമയില്‍ ഐശ്വര്യ ലക്ഷ്മിയായിരുന്നു നായിക. ഡ്രീം മില്‍ സിനിമാസ് ആന്‍ഡ് എന്റര്‍ടെയിന്‍മെന്റ്‌സും മൂണ്‍ഷൂട്ട് എന്റര്‍ടെയിന്‍മെന്റ്‌സും ചേര്‍ന്നാണ് നിര്‍മ്മിച്ചിരുന്നത്.
സിനിമയിലെ പാട്ടുകള്‍ ഏറെ കാലമായി യൂട്യൂബില്‍ തരംഗമായിരുന്നു. മായാനദിയിലെ ചില രംഗങ്ങളില്‍ അശ്ലീലം ഉണ്ടെന്ന് ചിലര്‍ പറഞ്ഞിരുന്നു. ഇതിനെതിരെ ടൊവിനോ തോമസ് തന്നെ പ്രതികരണവുമായി രംഗത്തെത്തിയിരിക്കുകയാണ്. ഇങ്ങനെ കാണുന്നവര്‍ കപട സദാചാരവാദികളാണെന്നാണ് ടൊവിനോ തോമസ് പറയുന്നത്.
‘സിനിമ റിലീസ് ചെയ്ത് രണ്ടാഴ്ച കഴിഞ്ഞിട്ടാണ് കണ്ടത്. ആ സമയത്തും നിറയെ കുടുംബ പ്രേക്ഷകര്‍ സിനിമ കാണാന്‍ ഉണ്ടായിരുന്നു. ഒരു പ്രേക്ഷകരില്‍ നിന്നും ഒരു രംഗത്തിലും മോശം പ്രതികരണമുണ്ടായില്ലെന്നും ടൊവിനോ വ്യക്തമാക്കുന്നു. ഇഴുകി ചേര്‍ന്ന് അഭിനയിച്ചത് ആ സിനിമയില്‍ അത് അത്യാവശ്യമുള്ളത് കൊണ്ടായിരുന്നു.
ഞങ്ങളുടെ മുഖവും കാലുകളും ഷോള്‍ഡറും മാത്രമാണ് അത്തരമൊരു രംഗത്തില്‍ യഥാര്‍ത്ഥത്തില്‍ കാണുന്നത്. അതുപയോഗിച്ച് അര്‍ത്ഥങ്ങള്‍ ജനിപ്പിക്കുന്നത് സിനിമയുടെ മാജിക്കാണ്. അതില്‍ അശ്ലീലം കാണുന്നത് കാണുന്നവരുടെ മാത്രം പ്രശ്‌നമാണെന്നും ടൊവിനോ വ്യക്തമാക്കി.
