സിനിമാ താരങ്ങളുടെ സമൂഹ മാധ്യമങ്ങളിലെ ഇടപെടലുകള്‍ സസൂക്ഷ്മം നിരീക്ഷിക്കുന്നവരാണ് ഭൂരിപക്ഷം ആരാധകരും. മലയാളികളും ഇക്കാര്യത്തില്‍ ഒട്ടും പിന്നിലല്ല. പ്രിയ താരങ്ങളോടു മാത്രമല്ല അവരുടെ കൂളിങ് ഗ്ലാസുകളോടും ഇവര്‍ക്കു താല്പര്യം ലേശം കൂടുതണെന്നു തോന്നുന്നു.
ഉണ്ണി മുകുന്ദന്‍ കൂളിങ് ഗ്ലാസ് വച്ച് പോസ്റ്റ് ചെയ്ത ഒരു ചിത്രത്തിനു താഴെ ‘ഉണ്ണിയേട്ടാ ആ ഗ്ലാസ് തരുമോ പ്ലീസ്’ എന്ന് ഒരു ആരാധകന് കമന്റ് ചെയ്തു. ചിത്രത്തില്‍ താന്‍ വച്ചിരുന്ന കൂളിങ് ഗ്ലാസ് ആരാധകന്റെ വിലാസത്തിലേക്ക് എത്തിച്ചു കൊടുത്താണ് ഉണ്ണി മുകുന്ദന്‍ കയ്യടി വാങ്ങിയതെങ്കില്‍ അതെ ചോദ്യത്തിന് ആളുമാറിപ്പോയെന്ന മറുപടിയുമായാണ് ടൊവിനോ എത്തിയത്.
കൂളിങ് ഗ്ലാസ് ധരിച്ച ഒരു ചിത്രം ടൊവിനോ ഇന്‍സ്റ്റഗ്രമാല്‍ പങ്കുവച്ചതിനു പിന്നാലെ ‘ഇങ്ങള്‍ കണ്ണട തരോ’ എന്നു ചോദിച്ചെത്തിയ ആരാധകന് ‘ശൂ ശൂ ആള് മാറി, അതിവിടെയില്ലെന്നാണ്’ ടൊവിനോ നല്‍കിയ മറുപടി.
ടൊവിനോയുടെ കമന്റിനു പിന്നാലെ ‘എന്നാലും കൊടുക്കാരുന്നു’, ‘നല്ലോണം ഇരന്നിട്ടല്ലേ’ എന്നു തുടങ്ങി നിരവധി രസകരമായ കമന്റുകളാണ് ഇപ്പോള്‍ എത്തുന്നത്.
