ഇന്ത്യയിലെ കമ്മ്യൂട്ടര്‍ ബൈക്ക് ശ്രേണിയില്‍ ശക്തമായ മത്സരത്തിന് കളമൊരുക്കിയ ടിവിഎസ് റേഡിയോണിന്റെ ബിഎസ്-6 പതിപ്പ് വിപണിയില്‍ അവതരിപ്പിച്ചു. ബിഎസ്-4 മോഡലുകളെക്കാള്‍ 8600 രൂപ വരെ വില വര്‍ധിപ്പിച്ചാണ് ബിഎസ്-6 എന്ജിന് റേഡിയോണ്‍ എത്തിയിരിക്കുന്നത്.
58,992 രൂപ മുതല്‍ 64,992 രൂപ വരെയാണ് റേഡിയോണിന്റെ പുതിയ എക്‌സ്‌ഷോറൂം വില. ഫ്യുവല്‍ ഇഞ്ചക്ഷന്‍ സംവിധാനവും എന്ജിന് നല്‍കിയിട്ടുണ്ട്. 109.7 സിസി സിംഗിള്‍ സിലിണ്ടര്‍ എയര്‍ കൂള്‍ഡ് എന്ജിന് തന്നെയാണ് റേഡിയോണിന് കരുത്തേകുന്നത്. ഇത് 8.08 ബിഎച്ച്പി പവറും 8.7 എന്‍എം ടോര്‍ക്കുമേകുന്നു.
നാല് സ്പീഡ് ഗിയര്‍ബോക്‌സാണ് പുതിയ മോഡലിലും ട്രാന്‍സ്മിഷന്‍ ഒരുക്കുന്നത്.
സിംഗിള്‍ ക്രാഡില്‍ ട്യൂബുലാര്‍ ഫ്രെയ്മിലാണ് റേഡിയോണിന്റെ പിറവി. വലിയ സീറ്റ്, ഹെഡ്‌ലാമ്പിലെ ക്രോം ബെസല്‍, ടാങ്കിലെ പ്ലാസ്റ്റിക് പാഡിങ്, ചാമ്പ്യന്‍ ഗോള്‍ഡ് എന്ജിന് കവര്‍, അനലോഗ് ഇന്‍സ്ട്രുമെന്റ് ക്ലസ്റ്റര്‍, ഓപ്ഷണലായി യുഎസ്ബി ചാര്‍ജിങ് സ്ലോട്ട് എന്നിവയാണ് വാഹനത്തിന്റെ സവിശേഷത.
180 എംഎം ആണ് വാഹനത്തിന്റെ ഗ്രൗണ്ട് ക്ലിയറന്‍സ്. 10 ലിറ്റര്‍ ഫ്യുവല്‍ ടാങ്ക് കപ്പാസിറ്റിയും 18 ഇഞ്ച് അലോയി വീലുമാണ് വാഹനത്തിനുള്ളത്.
