ചേര്‍ത്തല: ചേര്‍ത്തല ഒറ്റമശ്ശേരിയില്‍ രണ്ട് യുവാക്കള്‍ കഴിഞ്ഞ ദിവസം ലോറിയിടിച്ച് മരണപ്പെട്ട സംഭവം കൊലപാതകമെന്ന് പൊലീസ്. പട്ടണക്കാട് പഞ്ചായത്ത് 17 ആം വാര്‍ഡ് കാട്ടുങ്കല്‍ തൈയ്യില്‍ യോഹന്നാന്റെ മകന്‍ ജോണ്‍സണ്‍ (40), 19 ആം വാര്‍ഡില്‍ കളത്തില്‍ പാപ്പച്ചന്റെ മകന്‍ സുബിന്‍ (27) എന്നിവരാണ് മരിച്ചത്.
സംഭവുമായി ബന്ധപ്പെട്ട് ലോറി ഡ്രൈവര്‍ തുമ്പി സുബിനെ പൊലീസ് അറസ്റ്റ് ചെയ്തു. ഇയാളെ പൊലീസ് ചോദ്യം ചെയ്തു വരികയാണ്. പൂര്‍വ്വ വൈരാഗ്യമാണ് കൊലപാതകത്തിനു പിന്നിലെന്നു പോലീസ് അറിയിച്ചു.
ഒറ്റമശേരിക്ക് സമീപം ഇന്നലെ വൈകിട്ട് 6.30 ഓടേയായിരുന്നു സംഭവം. മത്സ്യബന്ധനം കഴിഞ്ഞ് വീട്ടിലേക്ക് മടങ്ങുകയായിരുന്ന യുവാക്കള്‍ സഞ്ചരിച്ചിരുന്ന ബൈക്കിന് പിന്നില്‍ ടിപ്പര്‍ ലോറി ഇടിക്കുകയായിരുന്നു. ഗുരുതരമായി പരിക്കേറ്റ ഇരുവരെയും ചേര്‍ത്തല താലൂക്ക് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
