അബുദാബി: യുഎഇയില്‍ ജോലി നഷ്ടപ്പെട്ട പ്രവാസികള്‍ക്ക് ആറു മാസം വരെ രാജ്യത്ത് തുടരാം. നിലവില്‍ വിസാ കാലാവധി കഴിഞ്ഞാലും പ്രവാസികള്‍ക്ക് രാജ്യത്ത് തുടരാവുന്ന ഗ്രേസ് പീരീയഡ് 30 ദിവസമാണ്. 90 മുതല്‍ 180 ദിവസം വരെയാണ് ഗ്രേസ് പീരീയഡ് നീട്ടിയതെന്ന് യുഎഇ വിദേശ വാണിജ്യ സഹമന്ത്രി ഡോ. ഥാനി ബിന്‍ അഹ്‌മദ് അല്‍ സിയൂദി അറിയിച്ചു.
ജോലി നഷ്ടമായ പ്രവാസികള്‍ക്ക് ആശ്വാസമാകുന്ന തീരുമാനമാണിത്. ആറു മാസത്തെ കാലയളവിനുള്ളില്‍ രാജ്യത്ത് താമസിച്ചുകൊണ്ട് തന്നെ പുതിയ ജോലി കണ്ടെത്താനും ഇത് സഹായിക്കും. അടുത്ത 50 വര്‍ഷങ്ങളില്‍ യുഎഇയെ തൊഴില്‍, നിക്ഷേപം, സംരംഭകത്വം, വിദ്യാഭ്യാസം, ജീവിതരീതി എന്നിവയ്ക്ക് ഏറ്റവും അനുയോജ്യമായ രാജ്യമാക്കി മാറ്റുക എന്ന ലക്ഷ്യത്തിന്റെ ഭാഗമായി രാജ്യത്തേക്കുള്ള പ്രവേശനം, റസിഡന്‍സി എന്നീ നിയമങ്ങളില്‍ സുപ്രധാന മാറ്റങ്ങളും വരുത്തിയിട്ടുണ്ട്. ഇതിന്റെ ഭാഗമായി ബിസിനസ് യാത്രകള്‍ക്കുള്ള പെര്‍മിറ്റ് മൂന്നു മാസത്തില്‍ നിന്ന് ആറു മാസമായി ഉയര്‍ത്തി.
അടുത്ത കുടുംബാംഗങ്ങളുടെ വിസയില്‍ മാതാപിതാക്കള്‍ക്ക് സ്പോണ്‍സര്‍ഷിപ്പ്, മാനുഷിക പരിഗണന നല്‍കേണ്ട കേസുകളില്‍ ഒരു വര്‍ഷത്തെ റസിഡന്‍സി നീട്ടി നല്‍കല്‍, മാതാപിതാക്കളുടെ റസിഡന്‍സി വിസയില്‍ കുട്ടികളെ സ്‌പോണ്‍സര്‍ ചെയ്യാവുന്ന പ്രായപരിധി 18ല്‍ നിന്ന് 25 ആയി ഉയര്‍ത്തി എന്നിവയും പുതിയ പ്രഖ്യാപനങ്ങളില്‍പ്പെടുന്നു.
