ദുബായ് : യുഎഇയില്‍ നിന്ന് കേരളത്തിലേക്കുള്ള സര്‍വീസുകള്‍ അവസാനിപ്പിക്കാന്‍ ഒരുങ്ങി ജെറ്റ് എയര്‍വേയ്‌സ്. കമ്പനി കടുത്ത സാമ്പത്തിക പ്രതിസന്ധി നേരിടുന്നതിനാലാണ് കേരളത്തിലേക്കുള്ള എല്ലാ സര്‍വ്വീസുകളും അവസാനിപ്പിക്കാനുള്ള പുതിയ തീരുമാനം. ബജറ്റ് എയര്‍ലൈനായ ജെറ്റ് എയര്‍വേയ്‌സ് എന്തുകൊണ്ടും പ്രവാസികള്‍ക്കൊരു ആശ്വാസമായിരുന്നു.
ദുബായില്‍ നിന്നും തിരുവനന്തപുരത്തേക്കും കൊച്ചിയിലേക്കുമുള്ള സര്‍വീസുകള്‍ നേരത്തെ തന്നെ കമ്പനി റദ്ദാക്കിയിരുന്നു. യുഎഇയില്‍ നിന്ന് ദക്ഷിണേന്ത്യന്‍ നഗരങ്ങളിലേക്കുള്ള സര്‍വീസുകളെല്ലാം നിര്‍ത്തലാക്കാനാണ് കമ്പനിയുടെ പുതിയ തീരുമാനം. ഫെബ്രുവരി പത്തിന് ശേഷം ഷാര്‍ജയില്‍ നിന്ന് കൊച്ചിയിലേക്കുള്ള സര്‍വ്വീസ്സുകള്‍ ഉണ്ടാകില്ലെന്ന് കമ്പനി അറിയിച്ചിരിക്കുന്നതായാണ് റിപ്പോര്‍ട്ടുകള്‍.
എന്നാല്‍ കമ്പനി നേരത്തെ ടിക്കറ്റുകള്‍ ബുക്ക് ചെയ്തവര്‍ക്ക് ടിക്കറ്റുകള്‍ റദ്ദാക്കാന്‍ താല്‍പര്യമുണ്ടെങ്കില്‍ മുഴുവന്‍ തുകയും തിരികെ നല്‍കുകയും നിയന്ത്രണങ്ങള്‍ക്ക് വിധേയമായി ഒരു തവണ സൗജന്യമായി യാത്ര പുനഃക്രമീകരിക്കാനും അവസരം നല്‍കുകയും ചെയ്യും.
