ദുബായ്: യുഎഇയില്‍ മൂന്ന് വയസ്സിനും അതില്‍ മുകളില്‍ പ്രായമുള്ള എല്ലാ കുട്ടികള്‍ക്കും മാസ്‌ക് നിര്‍ബന്ധമാക്കി അധികൃതര്‍. കൊവിഡ് പടരാതിരിക്കാന്‍ മാസ്‌കുകള്‍ നിര്‍ണായകമാണെന്ന് യുഎഇ ആരോഗ്യ മേഖലയുടെ വക്താവ് ഡോ. ഫരീദ അല്‍ ഹൊസാനി പറഞ്ഞു.
മെഡിക്കല്‍ ഡ്രേഡ് മാസ്‌കുകള്‍ മികച്ച സുരക്ഷ നല്‍കുമെന്ന് കൊവിഡിനെ കുറിച്ച് ഒരു ഓണ്‍ലൈന്‍ സെഷനില്‍ സംസാരിക്കവെ ഫരീദ പറഞ്ഞു. ‘മൂന്ന് വയസ്സിന് മുകളിലുള്ള കുട്ടികള്‍ മുഖാവരണം ധരിക്കണം. മൂന്ന് വയസ്സിന് താഴെ പ്രായമുള്ള കുട്ടികള്‍ ഫേസ് ഷീല്‍ഡുകള്‍ ധരിക്കണം.
കളിസ്ഥലങ്ങള്‍ പോലുള്ള തിരക്കേറിയ ഇടങ്ങളിലേക്ക് കുട്ടികളെ കൊണ്ടുപോകുന്നത് മാതാപിതാക്കള്‍ കഴിവതും ഒഴിവാക്കണമെന്ന് ഫരീദ ഓര്‍മ്മപ്പെടുത്തി. ‘രാജ്യത്തെ പൗരന്മാരെയും താമസക്കാരെയും കൊവിഡ് പ്രതിസന്ധി വളരെ മോശമായി ബാധിച്ചു. അവരുടെ ജീവിതരീതികളും ശൈലികളും വരെ മാറ്റി’, ഫരീദ കൂട്ടിച്ചേര്‍ത്തു.
‘ഇതിലൂടെ കുടുംബങ്ങളെയും സമൂഹത്തെയും പുതിയ ആരോഗ്യകരമായ ജീവിതരീതികള്‍ സ്വീകരിക്കാനും കുട്ടികളെയും യുവാക്കളെയും ഉത്തരവാദിത്തങ്ങള്‍ ഏറ്റെടുക്കാനും സ്വതന്ത്രരാക്കാനും പ്രോത്സാഹിപ്പിക്കുകയും നിരവധി നെഗറ്റീവ് ജീവിതശൈലികള്‍ മാറ്റാനും ഇടയാക്കി.
