അരിസോ: അണ്ടർ 17 ലോകകപ്പിന് ഒരുങ്ങുന്ന ഇന്ത്യൻ ടീമിന് ഉജ്വല വിജയം. പരിശീലനത്തിന്റെ ഭാഗമായി യൂറോപ്പിൽ പര്യടനം നടത്തുന്ന ഇന്ത്യയുടെ അണ്ടർ 17 ടീം കരുത്തരായ ഇറ്റലിയെ പരാജയപ്പെടുത്തി. ഏകപക്ഷീയമായ രണ്ടു ഗോളിനായിരുന്നു ഇന്ത്യയുടെ വിജയം.
മലയാളി താരം രാഹുൽ പ്രവീണിന്റെ പ്രകടനമാണ് ഇന്ത്യൻ വിജയത്തിൽ നിർണായകമായത്. 80-ാം മിനിറ്റിൽ പ്രവീണ്‍ ഗോൾ നേടിയപ്പോൾ മറ്റൊരു ഗോൾ അഭിജിത് സർക്കാരിന്റെ വകയായിരുന്നു.
31-ാം മിനിറ്റിലായിരുന്നു അഭിജിത്തിന്റെ ഗോൾ. ഇതാദ്യമായാണ് ഇന്ത്യയുടെ ഏതെങ്കിലും ഒരു ടീം ഇറ്റലിയുടെ ഏതെങ്കിലുമൊരു ഫുട്ബോൾ ടീമിനെ പരാജയപ്പെടുത്തുന്നത്.
രണ്ട് ദിവസം മുമ്പു നടന്ന മറ്റൊരു മത്സരത്തിൽ ഫ്രഞ്ച് ക്ലബായ എഫ്സി സെന്റ് ല്യൂവിനെ 1-1 ന് ഇന്ത്യ സമനിലയിൽ തളച്ചിരുന്നു.
