ഉത്തര്‍പ്രദേശ് പൊലീസിന്റെ നടപടിക്രമങ്ങളില്‍ നിന്നും പ്രചോദനം ഉള്‍ക്കൊണ്ട് ഡല്‍ഹി പൊലീസ്. ഡല്‍ഹി നോര്‍ത്ത് ഈസ്റ്റില്‍ നടന്ന കലാപങ്ങളില്‍ നശിപ്പിക്കപ്പെട്ട പൊതുമുതല്‍, സ്വകാര്യ വസ്തുവകകള്‍ എന്നിവയുടെ നഷ്ടപരിഹാരം പ്രതിഷേധക്കാരില്‍ നിന്ന് തന്നെ ഈടാക്കാനാണ് പൊലീസിന്റെ തീരുമാനം. പിഴ ഈടാക്കുന്നതിന് പുറമെ, ഇവരുടെ സ്വത്ത് കണ്ടുകെട്ടിയും ഈ നഷ്ടപരിഹാരം പിടിച്ചെടുക്കുമെന്നാണ് റിപ്പോര്‍ട്ട്.
ക്രൈം ബ്രാഞ്ചിന്റെ സ്‌പെഷ്യല്‍ ഇന്‍വെസ്റ്റിഗേഷന്‍ ടീമും, പ്രാദേശിക പൊലീസും നഷ്ടങ്ങളുടെ കണക്കെടുക്കാന്‍ പ്രാദേശിക അധികൃതരോടും, ഡല്‍ഹി സര്‍ക്കാരിനും നിര്‍ദ്ദേശം നല്‍കിയിട്ടുണ്ട്. തീവെപ്പും, കൊള്ളയും, മറ്റ് തരത്തില്‍ നാശനഷ്ടങ്ങളും വരുത്തിയ ആളുകളെ തിരിച്ചറിയാനുള്ള ചുമതല പ്രത്യേക അന്വേഷണ സംഘത്തിനാണ്.
നിരവധി പ്രാദേശിക ക്രിമിനലുകളും, ക്രിമിനല്‍ പശ്ചാത്തലമുള്ളവരും സ്ഥിതിഗതികള്‍ പ്രയോജനപ്പെടുത്തി ജാഫ്രാബാദ്, കാരാവാള്‍ നഗര്‍, മൗജ്പൂര്‍, ഭജന്‍പുര തുടങ്ങിയ സ്ഥലങ്ങളില്‍ അക്രമം അഴിച്ചുവിട്ടതായാണ് കരുതുന്നത്. ചുരുങ്ങിയത് 1000 കലാപകാരികളെ തിരിച്ചറിഞ്ഞതായി ഡല്‍ഹി പൊലീസ് വ്യക്തമാക്കിയിട്ടുണ്ട്. ഇതുവരെ 630 പേരെയാണ് അറസ്റ്റ് ചെയ്തിട്ടുള്ളത്.
ഞായറാഴ്ച മുതല്‍ ബുധനാഴ്ച വരെ നീണ്ട കലാപത്തില്‍ നൂറുകണക്കിന് കോടികളുടെ നഷ്ടമാണ് ഡല്‍ഹിയില്‍ സംഭവിച്ചതെന്നാണ് കരുതുന്നത്. ഈസ്റ്റ് ഡല്‍ഹി മുനിസിപ്പല്‍ കോര്‍പ്പറേഷന്‍, പവര്‍ കമ്പനി ബിഎസ്ഇഎസ് എന്നിവരോട് നഷ്ടങ്ങള്‍ കണക്കാക്കാന്‍ സഹായം അഭ്യര്‍ത്ഥിച്ചിട്ടുണ്ട്.
