വാഷിങ്ടണ്‍:ഇന്ത്യന്‍ ദേശീയഗാനം വായിച്ച് യുഎസ് സൈനിക ബാന്‍ഡ്. ഇന്ത്യയും അമേരിക്കയും ചേര്‍ന്നുള്ള സംയുക്ത സൈനികാഭ്യാസത്തിലാണ് യുഎസ് സൈനിക ബാന്‍ഡ്, ജനഗണമന വായിച്ചത്. അമേരിക്കന്‍ സൈനികരുടെ ബാന്‍ഡ് ഇന്ത്യന്‍ ദേശീയഗാനം വായിക്കുന്ന വീഡിയോ സോഷ്യല്‍ മീഡിയയില്‍ വൈറലായിരുന്നു.
യുദ്ധഭ്യാസ് എന്ന പേരില്‍ വാഷിങ്ടണില്‍ സംഘടിപ്പിച്ച ഇന്ത്യയും അമേരിക്കയും ചേര്‍ന്നുള്ള സംയുക്ത സൈനിക അഭ്യാസം വെള്ളിയാഴ്ചയാണ് ആരംഭിച്ചത്. സമാപന ദിവസമായ ബുധനാഴ്ചയായിരുന്നു അമേരിക്കന്‍ സൈന്യം ജനഗണമന വായിച്ചത്.
സംയുക്ത സൈനിക അഭ്യാസത്തിനിടെ ഇന്ത്യന്‍ സൈനികരോടൊപ്പം പാട്ടുപാടി നൃത്തം ചെയ്യുന്ന അമേരിക്കന്‍ സൈനികരുടെ വീഡിയോ നേരത്തെ വൈറലായിരുന്നു. രണ്ടാം ലോക മഹായുദ്ധത്തിനിടെ കൊല്ലപ്പെട്ട അസം റെജിമെന്റിലെ ബദ്‌ലുറാം എന്ന പട്ടാളക്കാരനോടുള്ള ആദരമര്‍പ്പിക്കുന്നതിന്റെ ഭാഗമായായി ഇന്ത്യന്‍ സൈന്യത്തിന്റെ ‘ബദ്‌ലുറാം കാ ബാദന്‍’ എന്ന് തുടങ്ങുന്ന മാര്‍ച്ചിങ് ഗാനമാണ് അമേരിക്കയില്‍ നടന്ന ഇന്തോ-യു.എസ് സംയുക്ത സൈനികാഭ്യാസത്തിനിടെ ഇരുകൂട്ടരും ചേര്‍ന്ന് ആലപിച്ചത്.
