ഒട്ടാവോ: കാനഡയിലേക്ക് ഫൈസർ കൊവിഡ് വാക്സിൻ അടുത്തയാഴ്ച കയറ്റുമതി ചെയ്യുമെന്ന് കമ്പനി വക്താവ് അറിയിച്ചു. കാനഡയുമായുള്ള വാണിജ്യ ബന്ധം ശക്തമായിരുന്നിട്ടും ഇതാദ്യമായാണ് കമ്പനിയുടെ വാക്സിൻ കാനഡയിലേക്ക് കയറ്റുമതി ചെയ്യാൻ യുഎസ് അനുവദിക്കുന്നത്. അമേരിക്ക ഇതുവരെ വാക്സിൻ ആഭ്യന്തര ആവശ്യങ്ങൾക്ക് മാത്രം ഉപയോഗിച്ചിരുന്നതിനാൽ ബെൽജിയത്തിൽ നിന്നാണ് കാനഡ ഫൈസറിന്‍റെ വാക്സിൻ എത്തിച്ചു കൊണ്ടിരുന്നത്.
അടുത്തയാഴ്ച മുതൽ കാനഡയ്ക്ക് ഫൈസറിൽ നിന്ന് ആഴ്ചയിൽ 2 ദശലക്ഷം ഡോസ് വാക്സിൻ ലഭിക്കുമെന്ന് പ്രധാനമന്ത്രി ജസ്റ്റിൻ ട്രൂഡോ അറിയിച്ചു. വാക്സിൻ നിർമിക്കാനുള്ള സൗകര്യങ്ങൾ ഇല്ലാത്തതിനാൽ വാക്സിനേഷൻ നൽകുന്നതിൽ കാനഡ പിന്നിലായിരുന്നുവെങ്കിലും കഴിഞ്ഞ മാസങ്ങളിൽ രാജ്യത്തെ വാക്സിനേഷന്‍റെ തോത് വർധിച്ചിരുന്നു.
