വാഷിംഗ്ടണ്‍: കോവിഡ് വ്യാപനം മൂലം അടച്ചിട്ട രാജ്യത്തെ ആരാധനാലയങ്ങള്‍ ഉടന്‍ തുറന്ന് കൊടുക്കണമെന്ന് സംസ്ഥാനങ്ങളിലെ ഗവര്‍ണര്‍മാര്‍ക്ക് ഉത്തരവിട്ട്‌ അമേരിക്കന്‍ പ്രസിഡന്റ് ഡോണള്‍ഡ് ട്രംപ്.
പള്ളികള്‍, സിനഗോഗുകള്‍, മോസ്‌ക്കുകള്‍ തുടങ്ങിയ ആരാധനാലയങ്ങള്‍ അവശ്യ സേവനങ്ങളുടെ പട്ടികയില്‍ ഉള്‍പെടുന്നതാണെന്ന് ട്രംപ് പറഞ്ഞു. ഈ ആഴ്ച ആവസാനത്തോടെ തന്നെ ആരാധനാലയങ്ങള്‍ വീണ്ടും തുറക്കാന്‍ ഗവര്‍ണര്‍മാര്‍ അനുമതി നല്‍കണമെന്നും അങ്ങനെ ചെയ്യുന്നില്ലെങ്കില്‍ അധികാരം പ്രയോഗിക്കുമെന്നും ട്രംപ് അറിയിച്ചു. അമേരിക്കന്‍ സമൂഹത്തെ ഒന്നിപ്പിച്ചു നിര്‍ത്തുന്ന ഇടങ്ങളാണ് ആരാധനാലയങ്ങളെന്നും ട്രംപ് കൂട്ടിച്ചേര്‍ത്തു.
അതേസമയം, കോവിഡ് മഹാമാരിയില്‍ ജീവന്‍ നഷ്ടപെട്ടവരുടെ സ്മരണക്കു മുമ്പില്‍ ആദരാഞ്ജലികള്‍ അര്‍പ്പിച്ച് ദേശീയ പതാക മൂന്നു ദിവസം താഴ്ത്തികെട്ടുന്നതിനും ട്രംപ് ഉത്തരവിട്ടിട്ടുണ്ട്.
