തിരുവനന്തപുരം: വനിതാ മതിലിലൂടെ ഉയരുന്ന വനിതാ മുന്നേറ്റം യുഡിഎഫിനെയും ബിജെപിയേയും വിറളി പിടിപ്പിച്ചിരിക്കുകയാണെന്ന് എല്‍ഡിഎഫ് കണ്‍വീനര്‍ എ. വിജയരാഘവന്‍.
സ്ത്രീകളുടെ അഭിമാനവും സാമൂഹ്യനീതിയും കാത്ത് സൂക്ഷിക്കുന്നതിനും നവോത്ഥാന മൂല്യങ്ങള്‍ സംരക്ഷിക്കുന്നതിനുമാണ് വനിതാ മതിലെന്നും ഇത് വിജയമാക്കണമെന്നും അദ്ദേഹം പറഞ്ഞു.
അനാവശ്യമായ വിവാദങ്ങള്‍ ഉയര്‍ത്തിയും ഭീഷണിപ്പെടുത്തിയും സ്ത്രീകളുടെ പങ്കാളിത്തം തടയാമെന്ന പ്രതിപക്ഷത്തിന്റെ തന്ത്രം വിലപ്പോവില്ലെന്നും ഓരോ ദിവസം കഴിയുന്തോറും വിവിധ മേഖലകളില്‍ നിന്നായി ആയിരക്കണക്കിന് സ്ത്രീകള്‍ വനിതാ മതിലിനുള്ള പിന്തുണ അറിയിക്കുന്നുണ്ടെന്നും അദ്ദേഹം വ്യക്തമാക്കി.
നവോത്ഥാന മുല്യങ്ങളുടെ എതിരാളികളാണ് വനിതാ മതിലിനെ എതിര്‍ക്കുന്നത്. അത്തരം ഇരുട്ടിന്റെ ശക്തികളെ ചെറുത്ത് തോല്‍പ്പിച്ചേ മതിയാകൂ, അദ്ദേഹം കൂട്ടിച്ചേര്‍ത്തു.
