തിരുവനന്തപുരം: പ്രതിപക്ഷനേതൃസ്ഥാനത്തിലേക്ക് തിരഞ്ഞെടുക്കപ്പെട്ട വി ഡി സതീശന് തലസ്ഥാനത്തെത്തി കോണ്‍ഗ്രസിന്റെ മുതിര്‍ന്ന നേതാക്കളെ കണ്ടു. എ.ഐ.സി.സി ജനറല്‍ സെക്രട്ടറി കെ സി വേണുഗോപാലിനെ വീട്ടിലെത്തി കണ്ടശേഷമാണ് സതീശന് മറ്റ് നേതാക്കളെ സന്ദര്‍ശിച്ചത്. കെ.സി.യുമായി അല്പ സമയം ചര്‍ച്ച നടത്തി.
ചെന്നിത്തലയെ സന്ദര്‍ശിക്കാന്‍ സതീശന് കൂട്ടാക്കിയില്ല. ഇരുവരും മണ്ഡലങ്ങളില്‍ ആയതിനാല്‍ അടുത്തദിവസം സന്ദര്‍ശിക്കുമെന്നാണ് വിശദീകരണം. മികച്ച സംഘാടകനാണ് വി.ഡി .സതീശനെന്ന് കെ.സി വേണുഗോപാല്‍ മാധ്യമങ്ങളോടു പറഞ്ഞു. യു.ഡി.എഫിനെ തിരിച്ചുകൊണ്ടുവരുകയാണ് ഏക ലക്ഷ്യം. അതിന് സതീശന് കഴിയും. പാര്‍ട്ടിയെ ശക്തിപ്പെടുത്തുകയാണ് ഇപ്പോള്‍ വേണ്ടത്. വിജയം കൂട്ടായ പ്രവൃത്തിയുടെ ഭാഗമായി ഉണ്ടാകേണ്ടതാണെന്നും അദ്ദേഹം വ്യക്തമാക്കി.
പിന്നീട് കെ.പി.സി.സി ആസ്ഥാനത്തെത്തി പ്രസിഡന്റ് മുല്ലപ്പള്ളി രാമചന്ദ്രനുമായി സതീശന് കൂടിക്കാഴ്ച നടത്തി. തുടര്‍ന്ന് ഗൗരീശപട്ടത്തുള്ള മുതിര്‍ന്ന നേതാവ് വി.എം.സുധീരനെയാണ് സന്ദര്‍ശിച്ചത്. അതിന് ശേഷം യു.ഡി.എഫ് കണ്‍വീനര്‍ എം.എം.ഹസന്‍, മുന്‍ കെ.പി.സി.സി പ്രസിഡന്റ് തെന്നല ബാലകൃഷ്ണപിള്ള എന്നിവരെ സന്ദര്‍ശിച്ച ശേഷം,സതീശന് ശാസ്തമംഗലത്ത് ജി.കാര്‍ത്തികേയന്റെ വസതിയിലെത്തി ഡോ.സുലേഖയുടെ അനുഗ്രഹവും തേടി.
