കാരക്കസ്; അമേരിക്കയുടെ സാമ്പത്തിക ഉപരോധത്തെ അതിജീവിക്കുമെന്ന് വെനസ്വേലന്‍ പ്രസിഡന്റ് നിക്കോളാസ് മദൂറോ. അമേരിക്കയ്ക്ക് തങ്ങളെ പരാജയപ്പെടുത്താനാവില്ലന്നും അതിര്‍ത്തി ലംഘനങ്ങളെയും തടസങ്ങളെയും രാജ്യം അതിജീവിക്കുമെന്നും മദൂറോ പറഞ്ഞു. അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് സാമ്പത്തിക ഉപരോധ കരാറില്‍ ഒപ്പുവച്ചതിന് പിന്നാലെ രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെതിരെ രൂക്ഷ വിമര്‍ശനം ഉന്നയിച്ച മദൂറോ. രാജ്യത്തിനെതിരായ ട്രംപിന്റെ നടപടി വിഢിത്തരമാണന്നും അമേരിക്കയിലെയും ലോകത്തിലെയും ജനങ്ങളുടെ ശബ്ദം കേള്‍ക്കാതെ നടപ്പാക്കുന്ന കാര്യങ്ങള്‍ കൂട്ടക്കൊലകള്‍ക്ക് കാരണമാകുമെന്നും കുറ്റപ്പെടുത്തി. അമേരിക്കയിലെ വെനസ്വേലിയന്‍ ഗവണ്‍മെന്റിന്റെ സ്വത്തുക്കള്‍ മരവിപ്പിക്കുന്നതും ഇടപാടുകള്‍ക്ക് വിലക്കേര്‍പ്പെടുത്തുന്നതുമായ ഉപരോധ കരാറില്‍ കഴിഞ്ഞ ദിവസമാണ് ട്രംപ് ഒപ്പ് വെച്ചത്. മദൂറോ സര്‍ക്കാരിനെ അട്ടിമറിക്കാന്‍ ട്രംപ് നടപ്പിലാക്കിയ നിര്‍ണായക നീക്കമായാണ് ഇത് വിലയിരുത്തപ്പെടുന്നത്.
