വിധു വിന്‍സന്റിന്റെ പുതിയ ചിത്രത്തില്‍ നായികയാവാന്‍ ഒരുങ്ങി നിമിഷ സജയന്‍. സ്റ്റാന്‍ഡ് അപ്പ് എന്ന് പേരിട്ടിരിക്കുന്ന ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ പുറത്ത് വിട്ടു. വിധു വിന്‍സന്റ് തന്റെ ഫേസ്ബുക്ക് പേജിലൂടെയാണ് പോസ്റ്റര്‍ പുറത്തു വിട്ടത്.
2016ല്‍ മാന്‍ഹോള്‍ എന്ന ചിത്രത്തിലൂടെ സംസ്ഥാന സര്‍ക്കാരിന്റെ മികച്ച സംവിധായികയ്ക്കുള്ള പുരസ്‌കാരം നേടിയ വ്യക്തിയാണ് വിധു. മികച്ച പുതുമുഖ സംവിധായിക എന്നത് അടക്കം രണ്ട് പുരസ്‌കാരങ്ങള്‍ ചലച്ചിത്ര മേളയില്‍ നിന്ന് മാന്‍ഹോള്‍ കരസ്ഥമാക്കിയിരുന്നു.
ദിലീഷ് പോത്തന്‍ സംവിധാനം ചെയ്ത ‘തൊണ്ടിമുതലും ദൃക്‌സാക്ഷിയും’ എന്ന സിനിമയിലൂടെ ശ്രദ്ധേയയായ നായികയാണ് നിമിഷ സജയന്‍. തുടര്‍ന്ന് ഈട, മാംഗല്യം തന്തുനാനേന, ഒരു കുപ്രസിദ്ധ പയ്യന്‍ തുടങ്ങി ഒരുപിടി ചിത്രങ്ങളില്‍ മികച്ച അഭിനയം കാഴ്ചവെച്ചു. ഒരു കുപ്രസിദ്ധ പയ്യന്‍ എന്ന സിനിമയിലെ അഭിനയത്തിന് മികച്ച അഭിനേത്രിക്കുള്ള കേരള സംസ്ഥാന ചലച്ചിത്ര പുരസ്‌കാരവും നിമിഷ സ്വന്തമാക്കി. സനല്‍ കുമാര്‍ സംവിധാനം ചെയ്യുന്ന ചോല, രാജീവ് രവിയുടെ തുറമുഖം തുടങ്ങിയ ചിത്രങ്ങളാണ് നിമിഷയുടേതായി ഇനി പുറത്തിറങ്ങാനുള്ളത്.
