നിമിഷ വിജയന്‍ പ്രധാന വേഷത്തില്‍ എത്തുന്ന വിധു വിന്‍സന്റ് ചിത്രം സ്റ്റാന്‍ഡ് അപ്പിന്റെ ഫസ്റ്റ് ലുക്ക് പോസ്റ്റര്‍ ഇന്നലെ പുറത്തുവിട്ടിരുന്നു. ഇപ്പോഴിതാ ചിത്രത്തില്‍ നിമിഷയെ കൂടാതെ രജിഷ വിജയനും പ്രധാന വേഷത്തില്‍ എത്തുന്നു എന്നാണ് പുതിയ റിപ്പോര്‍ട്ട്. ഒരു പ്രമുഖ മാധ്യമത്തിന് നല്‍കിയ അഭിമുഖത്തില്‍ സംവിധായിക തന്നെയാണ് രജിഷയും ചിത്രത്തില്‍ അഭിനയിക്കുന്നുണ്ടെന്ന് പറഞ്ഞത്. ആദ്യമായാണ് രജിഷയും നിമിഷയും ഒരുമിച്ച് അഭിനയിക്കുന്നത്.
ഒരു സ്റ്റാന്‍ഡ് അപ്പ് കൊമേഡിയനായാണ് നിമിഷ ഈ ചിത്രത്തില്‍ എത്തുന്നത്. തന്റെ പെര്‍ഫോമന്‍സുകളില്‍ സ്വന്തം അനുഭവങ്ങളും സൗഹൃദങ്ങളും സന്തോഷങ്ങളുമെല്ലാം പങ്കുവെക്കുന്ന കഥാപാത്രമാണിതെന്നും വിധു വിന്‍സന്റ് പറഞ്ഞു. ചിത്രത്തിലെ രജിഷയുടെ കഥാപാത്രത്തെക്കുറിച്ച് ഇപ്പോള്‍ വെളിപ്പെടുത്താന്‍ ആകില്ലെന്നും അവര്‍ പറഞ്ഞു.
ഉമേഷ് ഓമനക്കുട്ടനാണ് ചിത്രത്തിന് തിരക്കഥ ഒരുക്കുന്നത്. സിലികോണ്‍ മീഡിയയാണ് ചിത്രം നിര്‍മ്മിക്കുന്നത്. ജൂണില്‍ ചിത്രത്തിന്റെ ഷൂട്ടിംഗ് ആരംഭിക്കുമെന്നും നവംബറില്‍ ചിത്രം തിയറ്ററുകളിലെത്തുമെന്നാണ് വിധുവിന്‍സന്റ് പറഞ്ഞത്.
.
