ന്യൂഡല്‍ഹി: ദക്ഷിണാഫ്രിക്കയ്ക്ക് എതിരായ ഏകദിനത്തില്‍ ഇന്ത്യന്‍ വിജയത്തോടൊപ്പം തിളങ്ങിയത് നായകന്‍ കൊഹ്‌ലി. ദക്ഷിണാഫ്രിക്കയ്‌ക്കെതിരെ 113 റണ്‍സാണ് താരം നേടിയത്. ഇതോടെ കളിച്ച വിദേശ രാജ്യങ്ങളിലെല്ലാം സെഞ്ചുറി പൂര്‍ത്തിയാക്കി എന്ന റെക്കോര്‍ഡ് സ്വന്തമാക്കിയിരിക്കുകയാണ് കൊഹ്‌ലി.
ടെസ്റ്റ് പദവിയുള്ള ഒന്‍പത് രാജ്യങ്ങളില്‍ കളിച്ചിട്ടുള്ള കൊഹ്‌ലി ദക്ഷിണാഫ്രിക്കയ്‌ക്കെതിരെ മാത്രമാണ് സെഞ്ചുറി നേടാനുണ്ടായിരുന്നത്. താരത്തിന്റെ പത്താം ഏകദിനത്തിലാണ് കൊഹ്‌ലി റെക്കോര്‍ഡ് നേട്ടം സ്വന്തമാക്കിയത്. ഇന്ത്യയില്‍ 76 ഏകദിനങ്ങളില്‍ നിന്ന് 14 സെഞ്ചുറികള്‍ താരം നേടിയിട്ടുണ്ട്.
ടെസ്റ്റ് പദവിയുള്ള പാക്കിസ്ഥാനെതിരെ മാത്രമാണ് അവരുടെ തട്ടകത്തില്‍വെച്ച് സെഞ്ചുറി നേടാന്‍ കൊഹ്‌ലിയ്ക്ക് സാധിക്കാത്തത്. പാക്കിസ്ഥാനില്‍ ഇതുവരെ കോഹ്ലി കളത്തിലിറങ്ങിയിട്ടില്ല. 15 മത്സരങ്ങള്‍ കളിച്ച ബംഗ്ലാദേശില്‍ വെച്ച് അദ്ദേഹം അഞ്ച് സെഞ്ചുറികള്‍ നേടി. 23 വീതം ഏകദിനങ്ങള്‍ കളിച്ച ഓസ്‌ട്രേലിയയിലും ശ്രീലങ്കയിലും വെച്ച് നാല് വീതം സെഞ്ചുറികള്‍ കൊഹ്‌ലി സ്വന്തമാക്കിയിട്ടുണ്ട്.
