കൊച്ചി: ചെങ്ങന്നൂര്‍ മണ്ഡലത്തിലുണ്ടായ കനത്ത തോല്‍വിയില്‍ നിന്ന് കോണ്‍ഗ്രസ്സിനും യുഡിഎഫിനും പല പാഠങ്ങളും ഉള്‍ക്കൊള്ളാനുണ്ടെന്ന് എംഎല്‍എ വി ടി ബല്‍റാം. സംഘടനാപരമായും രാഷ്ട്രീയമായും പല തിരുത്തലുകളും വരുത്തേണ്ടതുണ്ടെന്നും ബല്‍റാം പറഞ്ഞു. തന്റെ ഫേസ്ബുക്ക് പോസ്റ്റിലൂടെയാണ് ബല്‍റാം പ്രതികരണമറിയിച്ചത്.
എല്‍ഡിഎഫ് വിജയി സജി ചെറിയാന് അഭിനന്ദനങ്ങള്‍ നേരുന്നതിനൊപ്പം ബിജെപിയുടെ വോട്ടില്‍ ഗണ്യമായ കുറവുണ്ടായതില്‍ സന്തോഷമുണ്ടെന്നും ബല്‍റാം കുറിച്ചു.
എല്‍ഡിഎഫിന്റെ ഈ വിജയത്തിലൂടെ സര്‍ക്കാരിന്റെ തെറ്റായ നടപടികളെയും അടിക്കടി ഉണ്ടാകുന്ന വീഴ്ചകളെയും ജനങ്ങള്‍ കണ്ണുമടച്ച് വിശ്വസിക്കുന്നു എന്ന വിലയിരുത്തലിലേക്ക് ഭരണക്കാര്‍ മാറില്ലെന്ന് പ്രതീക്ഷിക്കുന്നതായും ബല്‍റാം പറഞ്ഞു.
