മോശം ഫോമിലുള്ള അജിങ്ക്യ രഹാനെയ്ക്ക് പകരം അഞ്ചാം ടെസ്റ്റില്‍ ഹനുമ വിഹാരിയ്ക്ക് അവസരം നല്‍കണമെന്ന് ഇന്ത്യയുടെ മുന്‍ താരം വിവിഎസ് ലക്ഷ്മണ്‍. നാലാം ടെസ്റ്റില്‍ 14, 0 എന്നിങ്ങനെയായിരുന്നു രഹാനെയുടെ സ്‌കോര്‍. പരമ്പരയില്‍ 7 ഇന്നിംഗ്‌സുകളില്‍ നിന്നായി 109 റണ്‍സാണ് താരത്തിന്റെ സമ്പാദ്യം.
കഴിഞ്ഞ ടെസ്റ്റുകളിലും രഹാനെയെ മാറ്റി വിഹാരിക്കോ സൂര്യകുമാര്‍ യാദവിനോ അവസരം നല്‍കണമെന്ന് വിവിധ കോണുകളില്‍ നിന്ന് ആവശ്യം ഉയര്‍ന്നിരുന്നു. അതേസമയം, നാലാം ടെസ്റ്റ് ആവേശകരമായ അന്ത്യത്തിലേക്ക് കടക്കുകയാണ്. 10 വിക്കറ്റുകളും ഒരു ദിവസവും ശേഷിക്കേ 291 റണ്‍സ് കൂടിയാണ് ഇംഗ്ലണ്ടിനു വേണ്ടത്.
368 റണ്‍സ് വിജയലക്ഷ്യവുമായി ഇറങ്ങിയ ആതിഥേയര്‍ നാലാം ദിനം അവസാനിക്കുമ്പോള്‍ വിക്കറ്റ് നഷ്ടമില്ലാതെ 77 റണ്‍സ് എന്ന നിലയിലായിരുന്നു. ഹസീം ഹമീദ് (43), റോറി ബേണ്‍സ് (31) എന്നിവരാണ് ക്രീസില്‍. ബാറ്റിംഗിന് ഏറെ അനുകൂലമായ പിച്ചില്‍ ഇംഗ്ലണ്ട് ഈ ലക്ഷ്യം അനായാസം മറികടന്നേക്കുമെന്നാണ് വിലയിരുത്തല്‍.
