മാനന്തവാടി: മാനന്തവാടി തലപ്പുഴ കമ്പമലയില്‍ തോക്കുകളേന്തി മുദ്രാവാക്യം വിളിച്ച് പട്ടാപ്പകല്‍ മാവോയിസ്റ്റ് പ്രകടനം.ഉച്ചയ്ക്ക് 1.30 ഓടെയാണ് സംഭവം.മൂന്ന് സ്ത്രീകള്‍ ഉള്‍പ്പെടെ ഏഴുപേരാണ് സംഘത്തില്‍ ഉണ്ടായിരുന്നത്. തോക്കുകളേന്തി മുദ്രാവാക്യം വിളിച്ച് പ്രകടനം നടത്തിയ ഇവര്‍ കവലയില്‍ പോസ്റ്ററുകള്‍ പതിച്ചു. കൂടാതെ നാട്ടുകാരോട് സംസാരിച്ചതായും റിപ്പോര്‍ട്ടുകള്‍ ഉണ്ട്.
ശ്രീലങ്കന്‍ അഭയാര്‍ഥികള്‍ക്കു പൗരത്വം നിഷേധിക്കാനുള്ള നടപടികളെ ചെറുക്കുക, പൗരത്വ റജിസ്റ്റര്‍ വിവരങ്ങള്‍ക്കായെത്തുന്ന ഉദ്യോഗസ്ഥരെ കായികമായി നേരിടുക തുടങ്ങിയ വാചകങ്ങളെഴുതിയ പോസ്റ്ററുകള്‍ കമ്പമലയിലെ പാടികള്‍ക്കു സമീപമുള്ള ശുചിമുറിസമുച്ചയത്തില്‍ പതിച്ചു.
സിപിഐ മാവോയിസ്റ്റ് കബനീദളം എന്നാണ് പോസ്റ്ററിൽ രേഖപ്പെടുത്തിയിരിക്കുന്നത്. സംഭവമറിഞ്ഞ് വനംവകുപ്പ് ഉദ്യോഗസ്ഥരും പൊലീസും തണ്ടര്‍ ബോള്‍ട്ടും തിരിച്ചില്‍ നടത്തുകയാണ്.
