റിയോ ഡി ജനീറോ: ഫുട്‌ബോള്‍ ലോകത്തെ വമ്പന്‍ ഡിയേഗോ മറഡോണയാണോ മെസ്സിയാണോ എന്ന ചോദ്യത്തിന് ആരും ഇതു വരെ കൃത്യമായൊരു ഉത്തരം നല്‍കിയിട്ടില്ല. രണ്ടു പേരും ഒന്നിനൊന്ന് മെച്ചം എന്നാണ് പല പ്രമുഖരും തടിതപ്പാനായി നല്‍കുന്ന ഉത്തരം.
എന്നാലിപ്പോള്‍ ബ്രസീലിയന്‍ ഫുട്‌ബോള്‍ ഇതിഹാസം സീക്കോ കൃത്യമായൊരുത്തരം നല്‍കി രംഗത്തെത്തിയിരിക്കുകയാണിപ്പോള്‍. അദ്ദേഹം പറയുന്നു മെസ്സിയേക്കാള്‍ കേമനായിരുന്നു മറഡോണ എന്നതാണ്. അതിന് പിന്നില്‍ സീക്കോയ്ക്ക് വ്യക്തമായ കാരണവുമുണ്ട്. അര്‍ജന്റീനയ്ക്ക് ഒരു കിരീടം പോലും നേടിക്കൊടുക്കാന്‍ സാധിച്ചില്ലെന്ന ഒറ്റ കാരണമാണ് മെസ്സിയെ മാറ്റി നിര്‍ത്താന്‍ കാരണം. ഫുട്‌ബോള്‍ ജീവിതത്തിന്റെ ഏറ്റവും ഉന്നതിയില്‍ മറഡോണ മെസ്സിയെക്കാള്‍ മികച്ച കളിക്കാരനായിരുന്നെന്നാണ് സീക്കോ പറഞ്ഞത്. മറഡോണ കളിച്ചത് പലപ്പോഴും അദ്ദേഹത്തെ മാന്‍ മാര്‍ക്ക് ചെയുന്ന കാലഘട്ടത്തില്‍ ആയിരുന്നുവെന്നും സീക്കോ കൂട്ടിച്ചേര്‍ത്തു.
ബാഴ്‌സലോണക്ക് വേണ്ടി കഴിഞ്ഞ 10 വര്‍ഷത്തിലധികമായി ഗോളടിച്ചു കൂട്ടിയ മെസ്സിക്ക് അര്‍ജന്റീനയുടെ കൂടെ ഒരു ലോകകപ്പ് എന്ന സ്വപനം നടന്നിരുന്നില്ല. അതെ സമയം മറഡോണ ഒരു തവണ ലോകകപ്പ് ജേതാവും മറ്റൊരു തവണ അര്‍ജന്റീനയുടെ കൂടെ റണ്ണേഴ്‌സ് അപ്പും ആയിരുന്നു.
