ഹൈദരാബാദ്: ആന്ധ്രാപ്രദേശില്‍ ബസ് മറിഞ്ഞ് 12 മരണം. മഡകാസിരയില്‍ നിന്നൂം പെനുകോണ്ടയിലേക്ക് പോയ ആന്ധ്രാ റോഡ് ട്രാന്‍സ്‌പോര്‍ട്ട് കോര്‍പറേഷന്റെ ബസാണ് അപകടത്തില്‍പെട്ടത്. നിരവധി പേര്‍ക്ക് അപകടത്തില്‍ പരിക്കേറ്റു.
അനന്തപുര്‍ ജില്ലയിലെ പെനുകോണ്ടയിലാണ് അപകടമുണ്ടായത്. മരിച്ചവരില്‍ നാല് വിദ്യാര്‍ത്ഥികളും ഉള്‍പ്പെടുന്നതായി പോലീസ് അറിയിച്ചു. ഗുരുതരമായി പരുക്കേറ്റവരെ ബംഗലൂരുവിലെ ആശുപത്രിയിലേക്ക് കൊണ്ടുപോയി. നാല്പതിലേറെ പേര്‍ ബസിലുണ്ടായിരുന്നുവെന്നാണ് പോലീസിനു ലഭിച്ച വിവരം. കൊക്കയിലേക്ക് പതിക്കുന്നതിനിടെ ബസ് പല തവണ മറിഞ്ഞതായും റിപ്പോര്‍ട്ടുണ്ട്.
