കമല്‍ഹാസന്റെ ഉത്തമവില്ലന്‍ ഏപ്രില്‍ രണ്ടിനാണ് ചിത്രം റിലീസ് ചെയ്യും. ചിത്രത്തിനെക്കുറിച്ചുള്ള അന്വേഷണങ്ങള്‍ക്കു നന്ദി പറഞ്ഞുകൊണ്ടുള്ള വീഡിയോയിലാണ് കമല്‍ഹാസന്‍ റിലീസ് തീയതി പ്രഖ്യാപിച്ചത്. ചിത്രത്തിന്റെ ഓഡിയോ റിലീസ് മാര്‍ച്ച് ഒന്നിനാണ്. ഉത്തമവില്ലന്റെ ടീസറിന് ആരാധകര്‍ക്കിടയില്‍ വന്‍ സ്വീകാര്യതയാണ് ലഭിച്ചത്. ചിത്രത്തില്‍ ഇരട്ടവേഷത്തിലാണ് കമല്‍ഹാസന്‍ അഭിനയിക്കുന്നത്.
ഉത്തമന്‍ എന്ന നാടകപ്രവര്‍ത്തകനെയും മനോരഞ്ജന്‍ എന്ന സിനിമാ താരത്തെയുമാണ് അവതരിപ്പിക്കുന്നത്. ഉര്‍വശി, ആന്‍ഡ്രിയ, കെ വിശ്വനാഥ്, ജയറാം, പാര്‍വതി മേനോന്‍ തുടങ്ങിയവരും ചിത്രത്തിലുണ്ടാകും. തിരുപ്പതി ബ്രദേഴ്‌സിന്റേയും രാജ് കമല്‍ ഫിലിംസ് ഇന്റര്‍നാഷണലിന്റേയും ബാനറില്‍ എന്‍ ലിംഗുസാമിയും കമല്‍ഹാസനും ചേര്‍ന്നാണ് ചിത്രം നിര്‍മ്മിക്കുന്നത്.
