ഒഴിവുകാലം ആഘോഷിക്കാന്‍ തെന്നിന്ത്യന്‍ സുന്ദരി ഹന്‍സിക യൂറോപ്പിലേക്ക് പറക്കുന്നു. ഒരു വര്‍ഷമായി വിവിധ സിനിമകളുടെ ഷൂട്ടിങ് തിരക്കിലാണ് ഹന്‍സിക. തമിഴിലും തെലുങ്കിലുമായി നിരവധി സിനിമകളാണ് കഴിഞ്ഞ വര്‍ഷം ഹന്‍സികയുടേതായി പുറത്തിറങ്ങിയത്. ഇനി കുറച്ചു ദിവസം വിശ്രമിക്കണമെന്നു താരം പറയുന്നു.
ഇഷ്ട പ്രദേശമായ യൂറോപ്പ് തന്നെ ഇതിനായി തെരഞ്ഞെടുത്തു. യൂറോപ്പിലെ വിവിധ രാജ്യങ്ങളിലായി നിരവധി സുഹൃത്തുക്കളാണ് ഹന്‍സികയ്ക്കുള്ളത്. ഒഴിവു സമയം ഇവരോടൊപ്പം അടിച്ചു പൊളിക്കാനാണ് തീരുമാനം.
അവധിക്കാലം കഴിഞ്ഞു തിരിച്ചെത്തിയാല്‍ താന്‍ ദത്തെടുത്ത കുട്ടികളുടെ കൂടെ സമയം ചെലവഴിക്കുമെന്നും ഹന്‍സിക പറയുന്നു. എല്ലാ അവധി ദിനത്തിലും ദത്തെടുത്ത കുട്ടികള്‍ക്കൊപ്പം സമയം ചെലവഴിക്കാന്‍ ഹന്‍സിക ശ്രമിക്കാറുണ്ട്. എന്നാല്‍ തിരക്കിട്ട ജോലികള്‍ കാരണം കഴിഞ്ഞ വര്‍ഷം ഹന്‍സികക്ക് അതിന് കഴിഞ്ഞില്ല. വിജയ് നായകനായ പുലി, ജയം രവിയുടെ റോമിയോ ജൂലിയറ്റ് എന്നിവയാണ് ഹന്‍സികയുടെ ഉടന്‍ പുറത്തിറങ്ങാനുള്ള ചിത്രങ്ങള്‍.
