കണ്ണൂര്‍: പരിയാരത്ത് മണല്‍ കടത്ത് തടയാന്‍ ശ്രമിച്ച എസ്.ഐക്കെതിരെ മണല്‍ മാഫിയയുടെ വധശ്രമം. പരിയാരം എസ്.ഐ കെ.എന്‍ രാജനെതിരെയാണ് ആക്രമണമുണ്ടായത്. എസ്.ഐയെ ലോറിയില്‍ നിന്ന് വലിച്ചെറിയുകയായിരുന്നു. ഗുരുതരമായി പരിക്കേറ്റ രാജനെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
പരിയാരം തിരുവട്ടൂരിലാണ് സംഭവം നടന്നത്. പുലര്‍ച്ചെ രാജനും മറ്റൊരു പൊലീസുദ്യോഗസ്ഥനും ബൈക്കില്‍ പട്രോളിങ് നടത്തുകയായിരുന്നു. ഇതിനിടെ മണല്‍ ലോറി ശ്രദ്ധയില്‍ പെട്ട എസ്.ഐ ലോറിയിലേക്ക് പാഞ്ഞുകയറുകയായിരുന്നു. എസ്.ഐയുമായി ലോറി അതിവേഗം ഓടിച്ചു പോയി. കൂടെയുണ്ടായിരുന്ന പൊലീസുകാരന്‍ ബൈക്കില്‍ ലോറിയെ പിന്തുടര്‍ന്നെങ്കിലും കണ്ടെത്താന്‍ കഴിഞ്ഞില്ല.
പിന്നീട് നടത്തിയ തെരച്ചിലിലാണ് രക്തത്തില്‍ കുളിച്ച നിലയില്‍ എസ്.ഐയെ ഇരിങ്ങലില്‍ കണ്ടെത്തിയത്. തലക്ക് പരിക്കേറ്റ എസ്.ഐ അബോധാവസ്ഥയിലാണ്. ലോറിക്കായുള്ള തെരച്ചില്‍ തുടരുകയാണ്.
