രാഷ്ട്രീയജീര്‍ണതയും അഴിമതിയും രാജ്യസ്‌നേഹവുമെക്കെ പ്രമേയമാകുന്ന ബോളിവുഡ് ചിത്രം ഡേര്‍ട്ടി പൊളിറ്റിക്‌സ് എത്തുന്നു. ചിത്രം ശ്രദ്ധേയമാകുന്നത് തന്നെ ബോളിവുഡിലെ മികച്ച താരനിരകൊണ്ടാണ്. ചിത്രീകരണം തുടങ്ങിയതുമുതല്‍ വിവാദങ്ങള്‍ വിട്ടൊഴിയാത്ത ചിത്രം ബോളിവുഡിന്റെ പുതുവര്‍ഷ പ്രതീക്ഷകളിലൊന്നാണ്.
സാധാരണ പെണ്‍കുട്ടിയില്‍ നിന്ന് രാഷ്ട്രീയ നേതൃനിരയിലേക്ക് ഉയര്‍ന്നു വരുന്ന അനോഘി ദേവി എന്ന കഥാപാത്രത്തിന് ജീവന്‍ നല്‍കി ഡേര്‍ട്ടി പൊളിറ്റിക്‌സിലൂടെ ഒരിടവേളക്ക് ശേഷം മല്ലിക ഷെരാവത്ത് ശക്തമായ തിരിച്ചുവരവിനൊരുങ്ങുകയാണ്. ജാക്കി ഷിറോഫ്, അനുപം ഖേര്‍, ഓം പുരി, അതുല്‍ കുല്‍ക്കര്‍ണി, നസിറുദ്ദീന്‍ ഷാ, അശുതോഷ് റാണ, രാജ്പാല്‍ യാദവ്, സുശാന്ത് സിംഗ് തുടങ്ങി വന്‍ താര നിര തന്നെ ചിത്രത്തിനായി അണിനിരക്കുന്നു.
