നേപ്പിയര്‍: ലോകകപ്പ് ക്രിക്കറ്റ് പൂള്‍ എയില്‍ ന്യൂസിലന്‍ഡിന് അഞ്ചാം ജയം. അഫ്ഗാനെതിരെ ആറു വിക്കറ്റിനാണ് കിവികള്‍ ജയിച്ചത്. 187 റണ്‍സിന്റെ വിജയലക്ഷ്യം ന്യൂസിലന്‍ഡ് 36.1 ഓവറില്‍ നാലുവിക്കറ്റ് നഷ്ടപ്പെടുത്തി മറികടന്നു. ഓപ്പണിംഗ് വിക്കറ്റില്‍ മാര്‍ട്ടിന്‍ ഗുപ്റ്റിലിന്റെയും (57) മക്കല്ലത്തിന്റെയും (42) മികച്ച ബാറ്റിംഗാണ് ന്യൂസിലാന്‍ഡിന് അനായാസ ജയം സമ്മാനിച്ചത്.
നായകന്‍ മക്കല്ലം 19 ബോളില്‍ നിന്നാണ് അര്‍ധശതകത്തിന് അരികില്‍വരെയെത്തിയത്. മക്കല്ലത്തെ മുഹമ്മദ് നാബിയാണ് പുറത്താക്കിയത്. ഗുപ്റ്റില്‍ റൗണ്‍ ഔട്ടായി. ലക്ഷ്യത്തിലെത്തുംമുമ്പ് ഗ്രാന്‍ഡ് എലിയറ്റും (19) കെയ്ന്‍ വില്യംസണും (33) വീണപ്പോള്‍ റോസ് ടെയ്‌ലറും (24*) കോറി ആന്‍ഡേഴ്‌സണും (7*) കൂടുതല്‍ പരിക്കേല്‍ക്കാതെ കിവികളെ ജയത്തിലേക്ക് എത്തിക്കുകയായിരുന്നു.
മത്സരത്തില്‍ ടോസ് നേടി ആദ്യം ബാറ്റ് ചെയ്ത അഫ്ഗാന്‍ 47.4 ഓവറില്‍ 186 ന് എല്ലാവരും പുറത്തായിരുന്നു. നാലു വിക്കറ്റ് വീഴ്ത്തിയ ഡാനിയേല്‍ വെട്ടോറിയും മൂന്ന് വിക്കറ്റ് വീഴ്ത്തിയ ട്രെന്റ് ബോള്‍ട്ടുമാണ് അഫ്ഗാന്‍ ബാറ്റിംഗ് നിരയെ തകര്‍ത്തത്. അഫ്ഗാന്‍ നിരയില്‍ സമിയുള്ള ഷെന്‍വാരിയും(54), നജിബുള്ള സഡ്രാനും(56) ഭേദപ്പെട്ട പ്രകടനം പുറത്തെടുത്തു.
