ക്രൈസ്റ്റ് ചര്‍ച്ച്: ലോകകപ്പ് ക്രിക്കറ്റിലെ ആദ്യമത്സരത്തില്‍ ശ്രീലങ്കയ്‌ക്കെതിരെ ന്യൂസിലന്‍ഡിന് ജയം. ക്രൈസ്റ്റ് ചര്‍ച്ചില്‍ നടന്ന മത്സരത്തില്‍ ശ്രീലങ്കയെ ന്യൂസിലന്റ് 98 റണ്‍സിനാണ് പരാജയപ്പെടുത്തിയത്.
ടോസ് നഷ്ടപ്പെട്ട് ബാറ്റിംഗിനിറങ്ങിയ ന്യൂസിലാന്റ് അന്‍പത് ഓവറില്‍ 331എന്ന കൂറ്റന്‍ സ്‌കോറാണ് പടുത്തുയര്‍ത്തിയത്. ന്യൂസിലാന്റിനു വേണ്ടി ബ്രണ്ടന്‍ മക്കല്ലം (65), കെയിന്‍ വില്യംസണ്‍ (75), കോറിആന്റേഴ്‌സണ്‍ (75) എന്നിവര്‍ അര്‍ദ്ധ സെഞ്ചുറി നേടി. ഇവരുടെ ബാറ്റിംഗ് മികവാണ് കീവിസിന് മികച്ച സ്‌കോര്‍ സമ്മാനിച്ചത്.
332 എന്ന വിജയലക്ഷ്യം പിന്തുടര്‍ന്ന് മറുപടി ബാറ്റിംഗിനിറങ്ങിയ ശ്രീലങ്ക 46.1 ഓവറില്‍ 233 റണ്‍സിന് എല്ലാവരും പുറത്തായി. ലഹിരു തിരമണെ(65), ഏഞ്ജലോ മാത്യൂസ് (46) എന്നിവര്‍ക്ക് മാത്രമെ ലങ്കന്‍ നിരയില്‍ അല്‍പമെങ്കിലും പിടിച്ചു നില്‍ക്കാനായുള്ളൂ. ന്യൂസിലന്‍ഡിനു വേണ്ടി ടിം സൗത്തി, ട്രെന്റ് ബോള്‍ട്ട്, ആഡം മില്‍നെ, ഡാനിയല്‍ വെട്ടോറി, കോറി ആന്‍ഡേഴ്‌സന്‍ എന്നിവര്‍ രണ്ടു വിക്കറ്റ് വീതം വീഴ്ത്തി.
