മുംബൈ: റിലയന്‍സ് ഇന്‍ഡസ്ട്രീസ് ലിമിറ്റഡിന്റെ മുകേഷ് അംബാനിയെ മറികടന്ന് സണ്‍ ഫാര്‍മ ഉടമ ദിലിപ് സാങ്‌വി ഏറ്റവും സമ്പന്നനായ ഇന്ത്യക്കാരനായി. ഓഹരിവിപണിയില്‍ ലിസ്റ്റ് ചെയ്ത കമ്പനികളിലെ ഉടമകളുടെ ഓഹരിമൂല്യമനുസരിച്ചാണ് 59കാരനായ ദിലിപ് ഒന്നാമനായത്.
മുംബൈ സ്‌റ്റോക് എക്‌സ്‌ചേഞ്ച് പുറത്തുവിട്ട കണക്കനുസരിച്ച് വ്യാഴാഴ്ച ഓഹരിവിപണിയില്‍ ഇടപാടുകള്‍ അവസാനിപ്പിച്ചപ്പോള്‍ 1.46 ലക്ഷം കോടി രൂപയാണ് ദിലിപിന്റെ ആസ്തി. സണ്‍ ഫാര്‍മ, സണ്‍ ഫാര്‍മ അഡ്വാന്‍സ്ഡ് റിസര്‍ച്, റാന്‍ബാക്‌സി ലാബ്‌സ് എന്നീ കമ്പനി ശൃംഖലകളില്‍ 63 ശതമാനം ഓഹരിയാണ് ദിലിപിനുള്ളത്.
റിലയന്‍സ് ഇന്‍ഡസ്ട്രീസ് ലിമിറ്റഡ്, റിലയന്‍സ് ഇന്‍ഡസ്ട്രിയല്‍ ഇന്‍ഫ്രാസ്ട്രക്ചര്‍ എന്നീ കമ്പനികളില്‍ 45 ശതമാനം ഓഹരിയുള്ള മുകേഷ് അംബാനിയുടെ ആസ്തി 1.32 ലക്ഷം കോടിയാണ്.
