റിയോ: ഈ സീസണിലെ സാംബ ഗോള്‍ഡ് ഫുട്‌ബോള്‍ അവാര്‍ഡ് ബാഴ്‌സലോണ താരം നെയ്മറിന്. യൂറോപ്യന്‍ ലീഗുകളില്‍ കളിക്കുന്ന ഏറ്റവും മികച്ച ബ്രസീല്‍ താരത്തിനുള്ള അവാര്‍ഡാണ് സാംബ ഗോള്‍ഡ്.
അത്‌ലറ്റിക്കോ മാഡ്രിഡിന്റെ ജിയോ മിറാന്‍ഡയെയും ചെല്‍സിയുടെ വില്യനെയും പിന്നിലാക്കിയാണ് നെയ്മര്‍ യൂറോപ്യന്‍ ലീഗുകളില്‍ കളിക്കുന്ന ഏറ്റവും മികച്ച ബ്രസീല്‍ താരത്തിനുള്ള അവാര്‍ഡ് സ്വന്തമാക്കിയത്. കഴിഞ്ഞ മൂന്ന് തവണയും തിയാഗോ സില്‍വയ്ക്കായിരുന്നു അവാര്‍ഡ്.
ബ്രസീലിന്റെ 11 മുന്‍ കളിക്കാരും പതിനൊന്ന് മാധ്യമപ്രവര്‍ത്തകരുമായിരുന്നു അവാര്‍ഡ് സമിതി.
സ്പാനിഷ് ക്ലബായ ബാഴ്‌സലോണയുടെ താരമാണിപ്പോള്‍ 22കാരനായ നെയ്മര്‍. 39 കളികളില്‍ നിന്ന് 20 ഗോളുകള്‍ നേടി. 2013 ല്‍ സാന്റോസില്‍ നിന്നാണ് നെയ്മര്‍ ബാഴ്‌സയിലെത്തിയത്.
ബ്രസീലിന് വേണ്ടി 60 കളികളില്‍ നിന്ന് 42 ഗോളുകളും നേടിയിട്ടുണ്ട്. ബ്രസീലിന് വേണ്ടി ഏറ്റവുമധികം ഗോളുകള്‍ നേടിയ അഞ്ചാമത്തെ താരവുമാണ് നെയ്മര്‍.
